Kandidati i Nismës për kryetar të Komunës së Obiliqit, Shefki Salihu, ka folur për kandidimin e tij dhe për vizionin politik në emisionin “Ditari” në Tëvë1.
Salihu tha se programi i tij ofron një qasje ndryshe, sidomos në aspektin e zhvillimit ekonomik dhe investimeve kapitale.
“Programi është shumë i rëndësishëm. Ofrojmë një ofertë politike që dallon nga të tjerat, sidomos në pjesën e investimeve kapitale dhe zhvillimit ekonomik. Në vitet e fundit, nuk është bërë asnjë investim kapital i mirëfilltë për qytetarët. Ne synojmë investime më të mëdha dhe më të qëndrueshme,” u shpreh ai.
Ai kritikoi qeverisjen aktuale komunale për mungesën e projekteve të qëndrueshme, ndonëse buxheti, sipas tij, është ndër më të lartët në Kosovë për kokë banori.
“Dështimet janë të shumta për qeverinë aktuale, sepse, së pari, le të themi se buxheti i shtetit për kokë banori në Komunën e Obiliqit është më i larti në Kosovë,” tha Salihu.
Duke folur për dy mandatet e qeverisjes aktuale në komunë, ai vlerësoi se në fillim kishte punë të mira, por më pas ka pasur kaos dhe mungesë vizioni.
“Në mandatin e parë të kësaj qeverisjeje ka pasur gjëra të mira dhe janë kryer disa punë, mirëpo në mandatin e dytë ka qenë një kaos i madh. Njerëzit janë lodhur nga kjo qeverisje dhe kanë nevojë për një ndryshim. Është koha për projekte të reja dhe për një qeverisje më të mirë dhe më të nevojshme,” theksoi ai.
