Kryeministri në detyrë Albin Kurti ka folur për kundërshtimet që ka bërë ndaj vendimeve të Gjykatës Kushtetuese edhe në ShBA.
Ai ka thënë se nuk ka ngurruar ta bëjë një gjë të tillë kur ka besuar se ato janë të gabuara.
Kurti në diskutimin publik në The New School, SHBA, sipas një deklarate që ka publikuar Vetëvendosje ka thënë kundërshtimin e vendimeve të gabuara si në rastin e seancës konstituive i sheh si detyrim jo vetëm si zyrtar politik, por si një aktivist e politik i përjetshëm.
“Nuk kam ngurruar të kritikoj vendimet e Gjykatës Kushtetuese kur besoj se ato janë të gabuara, ose edhe hipokrite si në këtë rast. E shoh këtë si detyrën time jo vetëm si zyrtar publik, por si një aktivist politik i përjetshëm, i rritur në traditën e kritikës së hapur dhe demokratike. Mund të them pa dyshim se asnjë vendim gjyqësor në katër vitet e fundit nuk ka qenë më i dhimbshëm për mua sesa ai që ndalonte kufizimet e fitimit për mallrat bazë, sepse u ka shkaktuar shumë dëm qytetarëve dhe familjeve më të cenueshme të Kosovës”, ka thënë Kurti.
