Deputeti në Bundestagun gjerman, Knut Abraham, në një intervistë për Tëvë1 thotë se është optimist që së shpejti kosovarët do të lëvizin pa viza në Evropë.
Anëtari i partisë konservatore CDU, thotë se çështja e liberalizimit të vizave për Kosovën është duke u diskutuar mes shteteve anëtare të bllokut evropian.
Sipas informacioneve që ka deputeti gjerman zhvillime pozitive po ndodhin në këtë drejtim.
“Jam shumë optimist për këtë çështje, ka disa shenja që tregojnë se procesi po shkon në rrugën e duhur. Është fakt se kriteret janë plotësuar nga Kosova, vetëm të shohim tani se a ka vullnet politik nga vendet e Bashkimit Evropian. Nga ajo që di unë, po zhvillohen bisedime për procesin e liberalizimit të vizave për Kosovën dhe kjo çështje do të diskutohet ne fund te këtij muaji”, tha ai për Tëvë1.
Abraham, foli edhe për çështjen e dialogut mes Kosovës dhe Serbisë, ku po përmendet nevoja për një kompromis final mes palëve.
Sipas tij, nuk duhet bërë kompromis në rast se Kosova nuk është e bindur se është marrëveshja e duhur.
Megjithatë ai thotë se dialogu duhet të vazhdoj.
“Në dialog duhet një marrëveshje që do iu përshtatet të dyja palëve, por nuk jam shumë optimist se do të arrihet një marrëveshje finale në të ardhmen e afërt. Këshilla ime është që të vazhdohet me dialog, në mënyrë të sinqertë. Por nuk duhet bërë kompromis në rast se nuk jeni të bindur se marrëveshja është e duhur”, thotë deputeti gjerman.
Përkrahje për liberalizim të vizave për Kosovën ka premtuar edhe kancelari gjerman, Olaf Scholz, i cili me datën 10 qershor do të vijë në Prishtinë.
Kronika e realizuar nga gazetari Shpat Blakçori
