Kryetari i Kuvendit të Kosovës, Dimal Basha, bashkë me kryeministrin në detyrë, Albin Kurti, ministrin e Punëve të Brendshme, Xhelal Sveçla, nënkryetaren e Kuvendit, Albulena Haxhiu, drejtorin e Policisë, Gazmend Hoxha dhe Drejtorin e AKI-së, Petrit Ajeti kanë vizituar familjen e heroit Afrim Bunjaku dhe iu shprehën ngushëllime në përvjetorin e dytë të rënies heroike të rreshterit.
Pas vizitës në shtëpinë e heroit Bunjaku, në fshatin Samadrexhë të Vushtrrisë, Basha, bashkë me Kurtin dhe Bislimi vendosën kurorë pranë varrit të heroit Bunjaku.
“Pas homazheve kreu i Kuvendit tha se heroi Afrim Bunjaku ra dy vjet më parë në mbrojtje të integritetit dhe sovranitetit të Republikës së Kosovës. Kryetari Basha shtoi se njerëz si rreshteri i Policisë, tashmë hero i Kosovës, Afrim Bunjaku, janë vazhdimësi e luftës së lavdishme të Ushtrisë Çlirimtare të Kosovës.
Ka qenë bindje e jona se lufta e fundit ka përfunduar dhe vendi ynë dha mjaftueshëm dëshmorë, por prapë u dëshmua se organet e sigurisë dhe njerëz si rreshteri Afrim Bunjaku janë vazhdimësi e amanetit që kanë lënë ushtarët e UÇK-së, që Kosova të mbetet një e pandarë”, tha kryetari Basha.
Basha theksoi se institucionet e Kosovës janë të gatshme që të mbështesin organet e sigurisë për të mbrojtur vendin nga çdo rrezik që i vjen, posaçërisht nga Serbia.
“Serbisë i bëjmë thirrje që të dorëzojë terroristët, për të cilët ka aktakuzë tash e një vit, në mënyrë që të vihen para drejtësisë e njëkohësisht i bëj thirrje bashkësisë ndërkombëtare që të ushtrojë presion ndaj shtetit serb për t’i dorëzuar ata që kanë kryer krime”, tha Basha./teve1.info/
