Kryetari i Komunës së Hanit të Elezit dhe njëherësh kandidati i PDK-së për kryetar komune, Mehmet Ballazhi, ka deklaruar se ka ndërtuar një qeverisje gjithëpërfshirëse, duke përfshirë përfaqësues nga të gjitha partitë politike, grupmoshat, gjinitë dhe rajonet gjeografike të komunës.
Sipas tij, kjo qasje ka qenë e domosdoshme për të thyer tabu të vjetra dhe për të krijuar një frymë të re liberale në qeverisje.
“Kam krijuar një qeverisje gjithëpërfshirëse, nga partitë politike, nga mosha e tyre, nga gjinia dhe nga përfshirja gjeografike, unë mendoj se do të vazhdojë më tutje sepse një koncept i tillë qeverisës ka qenë i domosdoshëm për të thyer ndoshta edhe tabu për të krijuar edhe një frymë liberale qeverise”, u shpreh Ballazhi.
Ai shtoi se qytetarët kanë treguar mbështetje masive për këtë model të qeverisjes.
Ballazhi gjithashtu theksoi përparimet në fushat e ambientit dhe kulturës, ku sipas tij janë bërë investime të qëlluara që çojnë drejt një zhvillimi të qëndrueshëm për komunën.
“Shifet se qytetarët në mënyrë masive kërkojnë apo më mbështesin në këtë koncept qeverisës. Jemi përpara dhe të avancuar qoftë edhe në veprimet e tjera të ambientit, kulturës ku kemi investuar në pikat e duhura që qojnë drejt një zhvillimi të qëndrueshëm”, tha ai ndër të tjera në emisionin “Ditari” në tëvë1./teve1.info/
