Një person është plagosur të enjten në fshatin Debëlldeh të Vitisë, pasi dyshohet se është qëlluar me armë zjarri nga një person tjetër, i cili ndodhet ende në arrati. Policia e Kosovës ka cilësuar rastin si “vrasje në tentativë”.
Sipas raportit 24-orësh të Policisë, viktima ka marrë lëndime nga arma e zjarrit dhe është dërguar për trajtim mjekësor.
“Viktima mashkull kosovar, ka pësuar lëndime nga arma e zjarrit, pasi që i dyshuari mashkull kosovar (për motive të panjohura), dyshohet se ka shtënë me armë gjuetie në drejtim të tij. Viktima për shkak të lëndimeve është dërguar për tretman mjekësor në QE-në Gjilan, ndërsa i dyshuari është larguar në drejtim të panjohur”, thuhet në raport.
Policia ka ndërmarrë bastisje në shtëpinë dhe objektet përcjellëse të të dyshuarit, ku janë gjetur armë dhe municione.
“Njësitet policore në konsultim e koordinim me prokurorin gjatë bastisjes në shtëpinë dhe objektet përcjellëse të dyshuarit kanë gjetur dhe konfiskuar: 1 pushkë gjysmë automatike, 1 pushkë pneumatike, 1 pistoletë me gaz, 149 fishekë, 3 gëzhoja dhe 2 DVR të kamerave të sigurisë. Rasti duke u hetuar”, njofton Policia.
Hetimet lidhur me rastin janë në vazhdimësi.
