Është vendi ku strehohen emigrantët të cilët vijnë nga vendet e huaja në Kosovë.
Qindra persona gjatë vitit, qëndrojnë në këtë Qendër të Emigrantëve e cila ndodhet në Vranidoll të Prishtinës.
Por nga kjo qendër në orët e para të së mërkurës vendosën të largohen tre persona.
Rastin është duke e hetuar Policia e Kosovës.
“Raportohet se dy meshkuj nga Bangladeshi dhe një mashkull nga Maroku, për arsye të pa njohur janë arratisur nga qendra. Rasti është duke u hetuar”, thuhet nga Policia e Kosovës.
Ish drejtori i drejtorisë së Emigracionit në Policinë e Kosovës, Refki Morina, tregon arsyet e mundshme që ndikojnë që emigrantët të largohen nga këto qendra.
“Çdo veprim që bie ndesh me ligjet në Kosovë ai përgjigjet për veprimtarin e vet dhe personat e tillë mund të kthehen nga kanë ardhur. Shumica prej këtyre personave që kërkojnë azil në Kosovë si destinacion i kanë vendet perëndimore”, shprehet Morina.
Kurse sipas jurisit Anton Nrecaj, largimi në këtë formë nga Qendra për Mbajtjen e Emigrantëve mund të ketë edhe pasoja ligjore për të njëjtit.
“Natyrisht kur kapen nga organet e drejtësisë këta persona automatikisht deportohen në vendin e tyre, gjithmonë duke iu shkaktuar masë e sanksioneve. Hapi i parë është që të riatdhesohen në vendin e tyre dhe situata të tilla nuk është që nuk kemi pasur por edhe në të kaluarën kjo pasi Qendra e Azilantëve nuk kanë mbikëqyrje të mjaftueshme”, ka thënë ai.
Në Qendrën e Mbajtjes së Emigrantëve në Vranidoll, qëndrojnë persona nga shtete të ndryshe të botës, që zihen duke qëndruar në Kosovë pa dokumente.
Tëvë1 ka dërguar pyetje edhe në Departamentin për Shtetësi, Azil dhe Migrim, në kuadër të Ministrinë e Punëve të Brendshme, mirëpo të njëjtit nuk kanë kthyer përgjigje.
