Këshilltari ligjor i delegacionit kosovar në negociatat e Rambujesë, Paul Williams, e ka përfunduar të enjten dëshminë e tij para Gjykatës Speciale në Hagë, ku po gjykohen ish-krerët e UÇK-së: Hashim Thaçi, Kadri Veseli, Jakup Krasniqi dhe Rexhep Selimi.
Williams, i cili nisi dëshminë të mërkurën, ishte dëshmitari i dytë i propozuar nga mbrojtja, pas ish-ndihmëssekretarit amerikan James Rubin. Gjatë paraqitjes së tij, ai ka folur për rolin e UÇK-së në procesin e paqes në Rambuje, duke ofruar kontekst politik e ligjor mbi pozicionin e palës kosovare në atë kohë.
Procesi gjyqësor në Dhomat e Specializuara pritet të vazhdojë të hënën, kur do të paraqitet dëshmitari i radhës, po ashtu i propozuar nga ekipi mbrojtës.
