Arabia Saudite dhe Pakistani, i cili zotëron armë bërthamore, kanë nënshkruar një pakt të ri të ndërsjellë mbrojtjeje që përcakton se çdo sulm ndaj njërës palë do të konsiderohet si një sulm ndaj të dyja vendeve, zhvillim ky që vie pas sulmit të fundit izraelit ndaj Katarit.
Mbretëria Saudite ka ruajtur prej kohësh lidhje të ngushta ekonomike, fetare dhe të sigurisë me Pakistanin, duke përfshirë, sipas disa raportimeve, financimin e programit bërthamor të Islamabadit gjatë fazave të tij të zhvillimit.
Analistët dhe diplomatë pakistanezë, të paktën në një rast, kanë sugjeruar ndër vite se Arabia Saudite mund të përfshihet nën ombrellën bërthamore të Pakistanit – veçanërisht në sfondin e tensioneve në rritje me Iranin për shkak të programit të tij bërthamor.
Sipas deklaratave të publikuara nga Ministria e Punëve të Jashtme të Pakistanit dhe Agjencia Shtetërore Saudite e Shtypit, marrëveshja përcakton se “çdo agresion kundër njërit prej vendeve do të konsiderohet agresion kundër të dyve”, citon AP.
“Kjo marrëveshje… synon të zhvillojë aspekte të bashkëpunimit mbrojtës midis dy vendeve dhe të forcojë parandalimin e përbashkët kundër çdo agresioni,” thuhet në deklaratë.
Izraeli nuk ka reaguar ende ndaj kërkesave për koment. Marrëveshja përfaqëson vendimin më të rëndësishëm të mbrojtjes të ndërmarrë nga një vend arab i Gjirit që pas sulmit ndaj Katarit.
Edhe Shtetet e Bashkuara, të cilat historikisht kanë qenë garantuesit kryesorë të sigurisë për vendet arabe të Gjirit, nuk kanë dhënë ende një qëndrim zyrtar për këtë zhvillim.
