Kryetari i Kuvendit të Kosovës, Dimal Basha, ka mirëpritur në takim Ambasadorin e Republikës së Francës në Kosovë, Olivier Guérot.
Sipas Bashes, në qendër të diskutimeve ishte thellimi i marrëdhënieve bilaterale, me theks të veçantë në fushën e arsimit dhe kulturës.
“Me Ambasadorin Guérot u pajtuam që të shtohen programet për shkëmbimin e studentëve të të dy vendeve tona dhe shtim të aktiviteteve kulturore frankofone, duke i forcuar kështu vlerat e përbashkëta, lidhjet mes popujve dhe bashkëpunimin mes studentëve e universiteteve tona”, ka shkruar ai në Facebook.
Basha ka shtuar se në takim ka potencuar edhe nevojën e procedimit të themelimit të institucioneve vartëse të Kuvendit, në mënyrë që sipas tij, të sigurohet funksionimi i plotë i institucioneve.
“Pikë tjetër e rëndësishme e bisedës ishte intensifikimi i bashkëpunimit për të nxitur investimet nga kompanitë franceze në Kosovë, në mënyrë që të krijohen vende të reja pune dhe njëkohësisht të afirmohet më tej potenciali i jashtëzakonshëm i rinisë sonë, e cila është profesionale, inovative dhe e orientuar drejt zhvillimit teknologjik e më gjerë”, ka njoftuar Basha.
Gjithashtu, në takim janë trajtuar çështje me rëndësi gjeopolitike dhe strategjike, si ndikimi rus në Evropë, nevoja e mbështetjes nga Franca për anëtarësimin e Kosovës në Këshillin e Evropës si dhe domosdoshmëria e largimit të masave nga Bashkimi Evropian ndaj Kosovës.
“Ndër të tjera theksova se këta hapa do të ndikojnë pozitivisht në forcimin e mëtejshëm të demokracisë dhe në mbrojtjen e lirive dhe të drejtave të njeriut në Kosovë. Po ashtu, Ambasadorit i shpreha edhe përkushtimin e plotë të Kuvendit të Republikës për mbrojtjen e të drejtave të të gjitha komuniteteve dhe theksova rëndësinë e integrimit të plotë në funksion të një shoqërie që bashkëjeton në respekt, barazi, paqe dhe zhvillim të gjithëmbarshëm në shtetin tonë”, ka përfunduar ai.
