Në njoftimin e Qeverisë thuhet se kryeministri Kurti duke shprehur kënaqësinë që ndodhet në Bratisllavë, e njoftoi për progresin në vitin e parë të qeverisjes, përmirësimin e indikatorëve ekonomikë dhe të atyre demokratikë, reformat në fushën e sundimit të ligjit dhe luftimin e krimit dhe të korrupsionit.
Në takim u diskutua për invazionin dhe agresionin e paprovokuar dhe të pajustifikuar të Rusisë në Ukrainë dhe për rreshtimin e Republikës së Kosovës përkrah Bashkimit Evropian dhe NATO-s në dënimin e sulmit dhe vendosjen e sanksioneve kundër Federatës Ruse.
“Kryeministri Kurti theksoi gatishmërinë e qeverisë për të ndihmuar Ukrainën, duke ofruar strehim për 5000 refugjatë dhe akomodim e kushte pune për 20 gazetarë ukrainas. Ministri Korçok e falënderoi kryeministrin Kurti dhe i shprehu mirënjohjen për dënimin e agresionit në Ukrainë dhe vendosjen e sanksioneve kundër Federatës Ruse, pozicion ky që vlerësohet shumë nga Sllovakia dhe Bashkimi Evropian. Kryeministri Kurti potencoi përcaktimin e qartë të Kosovës në rrugën e integrimeve europiane dhe euro-atlantike dhe theksoi nevojën që Sllovakia t’u bashkohet sa më shpejtë 22 vendeve të Bashkimit Evropian dhe 26 vendeve të NATO-s, të cilat e kanë njohur pavarësinë e Kosovës”, thuhet në njoftim.
Po ashtu, në këtë komunikatë thuhet se kryeministri kërkoi mbështetjen e Sllovakisë për liberalizimin e vizave, anëtarësimin në Këshillin e Evropës dhe anëtarësimin në Partneritetin për Paqe të NATO-s.
U bisedua edhe për dialogun me Serbinë dhe kryeministri tha se dialogu duhet të jetë parimor dhe i përqendruar tek njohja e ndërsjellë.
Kryeministri Kurti dhe Ministri i Jashtëm Korçok biseduan edhe për përvojat e Sllovakisë në tërheqjen e investimeve të jashtme dhe reformimin e prokurimit publik, me ç’rast u zotuan që të punojnë së bashku për të ndarë përvojat dhe njohuritë në këtë drejtim.