Iniciativa e Ballkanit të Hapur nga ekzekutivi i vendit po vazhdon të mbetet nismë e padëshiruar.
Kryeministri Kurti të enjten iu përgjigj negativisht ftesës së homologut maqedonas Kovaqeski për pjesëmarrje në Samitin e Ballkanit të Hapur. Megjithatë, njohës të zhvillimeve politike vlerësojnë se Kosova nuk duhet të jetë e mbyllur ndaj kësaj iniciative.
Njohësi i çështjes së integrimeve, Visar Xani thotë se pjesëmarrja në samit jodomosdoshmërisht do të thotë pranim për t’u bërë pjesë e iniciativës, teksa tregon edhe arsyen pse nisma mund të jetë pozitive.
“Çdo refuzim i ftesave të tilla nuk i jep imazh të mirë Kosovës shkak që bashkëpunimi rajonal, ai i përgjithshëm dhe pjesëmarrja në samite nuk e dëmtojnë asnjë vend, përkundrazi, këto i kirjojnë mundësi dhe aftësi qeverive për të krijuar dhe zhvilluar politikat e tyre diplomatike”, tha Xani.
Teksa njohësi i marrëdhënieve ndërkombëtare, Avdi Smajlaj mbrëmë në emisionin Info Nata në Tëvë 1, tha se përmes nismës Kosova mund të faktorizohet më mirë si shtet.
“Besoj se Kosova do të duhej që të bënte kalkulimet e veta dhe normalisht që është në interes të Kosovës sepse jetojmë në një kohë ku është një trend i integrimeve regjionale dhe globale. Izolimi nuk është zgjidhje”, tha Smajlaj.
Nisma Ballkani i Hapur u prezantua në tetor të vitit 2019 në Novi Sad të Serbisë. Ajo përkrahet nga Shqipëria, Serbia e Maqedonia e Veriut, por jo nga Kosova e Bosnje e Hercegovina.
Raporti i gazetarit, Gojart Jashari