Në këtë cep të sallës “Skënderbeu” në Tiranë po qëndron fotografia e ish-presidentit të ndjerë shqiptar, Bujar Nishanit.
Familja e tij po presin rendin e gjatë të qindra familjarëve, miqve e zyrtarëve shtetëror që kanë ardhur për ngushëllime.
Të pranishëm në këtë ceremoni ishin edhe Ilir Meta, presidenti aktual i Shqipërisë dhe Vjosa Osmani, presidente e Kosovës. Shtet për të cilin u tha se Nishani dha shumë.
Në fjalimin lamtumirës Presidenti, Ilir Meta tha se Nishani ishte burrë që i peshonte fjala e i cili punoi me përkushtim.
“Presidentit Nishani i peshonte fjala. Si Kryetar i Shtetit, ai punoi me përkushtim të rrallë në mbrojtje të Kushtetutës. Bujar Nishani ushqente një dashuri të veçantë për Kosovën, të cilën e shfaqte plot krenari dhe mbështeti fort njohjen ndërkombëtare të shtetit të Kosovës edhe në shërbim të stabilitetit dhe të sigurisë në Ballkanin Perëndimor”, tha Meta.
E presidentja Vjosa Osmani përmes një statusi në rrjetin social Facebook tha se ish-presidenti Nishani tërë jetën u angazhua për shtetin e kombin shqiptar.
“Në emër të qytetarëve të Kosovës u përkulëm para arkëmortit të Presidentit, shtetarit të paepur, njeriut të urtë e dinjitar, qytetarit të ndershëm e atdhetarit të përkushtuar. Ai u angazhua tërë jetën për shtetin e kombin shqiptar. Si President i Shqipërisë, ai u kujdes gjithnjë që Kosova të mbahet lart në agjendën e tij shtetërore”, ka shkruar Osmani.
Ndërkohë kryetari i Partisë Demokratike, Sali Berisha nuk mundi ta përfundonte fjalimin e tij për shkak të emocioneve dhe lotëve.
“Për Ersin, Fjonën sot është dita më e dhimbshme e jetës së tyre, por ata do jenë krenarë që patën fatin të kenë një baba si ti. Për Baba Faikun sot zija është më e rëndë se toka, por ai përsëri ndihet krenar se rriti një djalë si ti që i zbardhi faqen.Për të gjithë ne të tjerët që patëm mundësi të njohim e bashkëpunojmë, do mbetesh një burim i pashtershëm frymëzimi dhe do kesh përgjithmonë mirënjohjen. Dua të shpreh mirënjohje të thellë për familjen tënde dhe për ata që bën gjithçka që ti të mos niseshe në këtë rrugë…”, wshtw shprehur Berisha.
Qeveria e Shqipërisë shpalli një ditë zie Kombëtare, në nderim të ish-presidentit Nishani, i cili po ashtu ka mbajtur edhe poste të larta në qeveri, si ministër i drejtësisë dhe rendit.
Ish-Presidenti i Shqipërisë, Bujar Nishani, po trajtohej në një spital në Gjermani prej disa javësh nga një shërbim i specializuar për sëmundje të mushkërive.
Raporti i gazetares Jetmira Lushi.
