Ndonëse procesi mësimor kishte filluar, klasat ishin bosh.
Një numër i nxënëseve të shkollës “Ismail Qemali” në Prishtinë, mëngjesin e së mërkurës nuk filluan mësimin.
Prindërit kishin vendosur që të mos i dërgonin fëmijët në klasa, por të protestonin para hyrjes së shkollës pasi klasat ishin përfshirë nga ujërat e zeza të martën.
Me pankarta “Duam dije jo ujëra të zeza”, “Uji i zi rrezik për fëmijë” “Shkolla nuk është banjo publike” prindërit kërkuan që ky problem të rregullohej sa më parë.
“Kjo gjendje përsëritet çdo vit, unë kam ardhë me mbesën pasi nana e saj është në punë. Situata nuk është prej djeshit, pra është vite me radhë. Paramendoni çfarë uji i kanalizimit, sëmundja pra janë shku me fitu dijen fëmijët, por ata kanë rrezik prej ndonjë sëmundje”, thotë Nakshia Gjobalaj.
Madje sipas Liridona Krasniqit, e cila ka vajzën në këtë shkollë, problemi me ujëra të zeza në këtë institucion është tash e disa vite.
“Ky problemi ishte që disa vite, dhe e keqja është se ne si prind kemi vendos me u ngrit në këmbë për të mirën e fëmijëve tanë, që institucionet me ndërrmarë diçka që mu ndreq ky problem. E keqja është se shumë prind janë pajtuar me këtë dhe thonë që kurgjo nuk ju ka ndodhë gjeneratave të kaluara, nuk do të ndodhë as kësaj gjenerate dhe normalisht që është e rrezikshme pasi ata kanë me qëndru pesë orë qaty mbyllur”, thotë ai
Se këtu nuk është hera e parë që ka pasur rrjedhje të ujit, e thotë edhe vetë drejtoresha e shkollës “Ismail Qemali”, Mimoza Krasniqi.
“Brenda këtij viti është bërë tri herë, por për tri herë ujësjellësi e ka hapur dhe e ka mënjanuar problemin duke menduar që është përfunduar problemi. Pra kemi menduar që vetëm të reshurat janë duke shkaktuar problem dhe po na hinë uji brenda por kemi parë që nuk qëndron vetëm tek te reshurat”, shprehet Krasniqi.
Rrjedhja e ujërave te zeza, sipas Krasniqit, ka ndodhur pas bllokimit të pusetës e cila gjendet jashtë oborrit të shkollës.
Por ky problem sipas saj pritet të sanohet brenda ditëve.
“Drejtoria e Arsimit janë njoftuar dje dhe ata iu kanë përgjigjur thirrjes prej drejtorit të Arsimit, Samir Shahinit dhe zyrtarë të tjerë sot kanë qenë prezent me mëngjes. Ndërrmarja banesore, ujësjellësi, kanë qenë sot këtu dhe brenda dy-tri ditëve do të mënjanohet problemi i pusetes së oborrit të jashtëm”, thotë drejtoresha e shkollës.
Pas shpeshtimit të ujërave të zeza në ditën e dytë të vitit të ri shkollor, nxënësit e klasave të pesta ishin risistemuar në hapësira të tjera të shkollës.
E të mërkurën, sipas drejtoreshës, klasat janë dezinfektuar dhe të gatshme për mbajtjen e procesit mësimor.
