Federata e Basketbollit e Kosovës (FBK) ka njoftuar se data 4 shtator është afati i fundit për licencimin e klubeve dhe shkollave të basketbollit për edicionin garues 2025/26. Procesi i licencimit zhvillohet në përputhje me Rregulloren për Licencim dhe Garim dhe përfshin pesë kritere kryesore: sportiv, financiar, ligjor, etik e disiplinor, si dhe administrativ e infrastrukturor.
Për secilën kategori licence (A, B, C apo D) klubet duhet të dorëzojnë dokumentacionin përkatës. Ndër risi për edicionin e ri është obligimi i klubeve të Superligës së Meshkujve që të ndajnë të paktën 10% të buxhetit vjetor për gjeneratat e reja, si dhe të paraqesin një program vjetor trajnimi për grupmoshat U10–U18.
Po ashtu, klubet janë të detyruara të respektojnë politikat e mbrojtjes të miratuara nga FBK, duke emëruar një person përgjegjës për mbrojtjen e fëmijëve dhe duke marrë pjesë në trajnimet e nevojshme në këtë fushë.
Dokumentacioni për licencim duhet të dorëzohet në format fizik në zyrat e FBK-së deri më 4 shtator 2025.
