Autor: Adea Mustafaj
Prej dy vitesh, Sadik Shala nuk ka dal nga banesa e tij, që ndodhet në ndodhet në katin e tretë të një ndërtese në qendër të Pejës.
Lëvizjen, burrit në karrocë, ia ka pamundësuar mosfunksionimi i ashensorit, i cili prej kur është djegur, nuk është riparuar.
Shala rrëfen se në gjithë këtë periudhë kohore, nuk ka pasur mundësi që t’i kryej as kontrollet e nevojshme mjekësore.
“Për mu vështirë është mjaft. Që dy vjet. Ma mirë me konë në burg se edhe qeshtu. Kjo fjalë është shumë e rëndë me thonë ma mirë në burg se qeshtu, për arsye se jom mërzitë tu nejt këtu në banesë, tu e kqyr televizorin, kom hup shumë termine mjekësore. Jom i operum edhe në zemër për shkak të liftit”, shprehet ai.
Shala thotë se këtë problem e kanë adresuar në Komunë dhe për t’i dhënë një zgjidhje këtij problemi janë të gatshëm të participojnë gjysmën e shumës së nevojshme.
“Barem një herë me ardh me thonë ‘shkoj ta kqyri atë lift’. Dyqysh të hiqet pak. Po asnjëherë kurrë. Edhe krejt çka është e mundshme kemi bo. Edhe nuk është e thonë që ai me i qit krejt, na e participojmë, na qesim pare”, thotë ai.
Nga komuna e Pejës thonë se ka qenë i paraparë që të renovohet ky lift, mirëpo deri më tani nuk kanë arritur t’i sigurojnë mjetet e nevojshme financiare.
“Po siç e dini, ne nuk kemi ndërmarrje publike banesore që merret me mirëmbajtje të banesave. Çdo objekt ka një bord që funksionon edhe është dashtë përmes tyre. Na i kemi nda buxhet për tre ashensorë të rinj me i vendos, edhe këto me renovu, me rregullu, po siç e dini ju mediat dhe shumë qytetarë neve na janë marrë shumë mjete prej llogarisë për shkak të kontratës kolektive që ka qenë e nënshkrueme me mësimdhënës dhe nuk kemi buxhet sepse ato pare veçse jonë tërhekur”, ka thënë Faik Zeka nga Komuna e Pejës.
Sipas zëdhënësit të komunës, Faik Zekaj, ligjërisht është problematik intervenimi, për shkak se këto ndërtesa nuk janë pronë e komunës, dhe se nuk ka një ndërmarrje banesore që merret me mirëmbajtjen e tyre.
Deri në gjetjen e një zgjidhje, është gruaja e Sadik Shalës, ajo që përkujdeset për të gjitha punët jashtë banesës.
