Bledian Krasniqi është pranë një momenti të veçantë në karrierën e tij. Mesfushori i FC Zürich do të luajë ndeshjen e tij të parë zyrtare me Kombëtaren e Kosovës pikërisht kundër Zvicrës, vendit ku ka lindur dhe është rritur. Sfida zhvillohet më 5 shtator, në Bazel, në kuadër të kualifikimeve për Kampionatin Botëror.
Krasniqi, i cili vetëm para një viti vendosi të përfaqësojë Kosovën, e shpjegoi këtë zgjedhje për mediat zvicerane duke thënë se pas përfundimit të karrierës së tij me U21 të Zvicrës, nuk kishte më asnjë kontakt nga Federata zvicerane. “Nuk do ta quaja një largim nga Zvicra, por kur flet me federatën dhe njerëzit në Kosovë, emocionet janë të mëdha”, u shpreh 24-vjeçari.
Një rast i ngjashëm është edhe ai i Leon Avdullahut, një tjetër futbollist me të kaluar te kombëtaret zvicerane, i cili kohët e fundit zgjodhi Kosovën. Krasniqi tregon mirëkuptim për vendime të tilla dhe thekson se emocionet shpesh bëjnë diferencën.
Interesant është fakti që trajneri i ri i Kosovës, Franco Foda, është një emër i njohur për Krasniqin, pasi ai kishte drejtuar shkurtimisht FC Zürich-in, edhe pse pa shumë sukses. Foda mori drejtimin e “Dardanëve” në fillim të vitit 2024.
Përballja pritet me shumë interes, pasi Kosova deri më tani ka zhvilluar tri ndeshje ndaj Zvicrës dhe nuk ka pësuar asnjë humbje. Krasniqi shpreson që kjo seri pozitive të vazhdojë edhe në Bazel.
Interesimi për ndeshjen është i madh, me kërkesa rekord për bileta. “Ka shumë njerëz që më kanë kërkuar bileta, por nuk e di nëse do mund t’ua siguroj të gjithëve”, tha mesfushori me buzëqeshje.
Megjithatë, përpara kësaj sfide të madhe, Krasniqi është i fokusuar te detyrimet me klubin. FC Zürich këtë fundjavë udhëton në Winterthur për ndeshjet e kampionatit, ndërsa emocionet e vërteta do të shpërthejnë më 5 shtator në St. Jakob-Park, aty ku Zvicra do të presë Kosovën.
