Kryeministri në detyrë, Albin Kurti ka komentuar kërkesën për dorëheqje të kryetarit të Kuvendit, Dimal Basha për shkak të një artikulli kundër UÇK-së për të cilit tashmë ky i fundit është distancuar.
Kurti tha se problemet që i ka sot Kosova nuk janë për shkak të një artikulli apo deformimi apo keqinformimi ku Basha as nuk është autor i tij, por siç tha ai problemi qëndron kur u themelua Zajendica, Lista Serbe, e kur qeveritë në Kosovë u formuan të varura nga Lista Serbe.
Sipas tij artikulli i kryetarit të sapo zgjedhur të Kuvendit, Dimal Basha nuk ka të bëjë asgjë më UÇK-në.
Kurti këto komente i bëri pas përurimit të një çerdheje publike në qytetin e Fushë-Kosovës.
“Kryetari i Kuvendit, Dimal Basha e ka dhënë sqarimin për atë publikim që është bërë para më shumë se një dekade dhe aty e ka sqaruar se kapitulli apo kreu që e ka shkruar ai nuk ka asgjë të bëjë me Ushtrinë Çlirimtare të Kosovës….nuk ka të bëjë asgjë me UÇK edhe njëherë ju e keni parë fjalimin e tij pas zgjedhjes ka shprehur vlerësimet më të larta për këtë vlerë të shenjtë të kombit shqiptar. Unë besoj që problemet që i kemi sot në Kosovë nuk i kemi nga një deformim apo keqinterpretim i një artikulli me bashkëautorësi ku ky nuk është autor i atij kapitulli. Problemet i kemi kur është nënshkruar Zajednica në 2013, problemet i kemi kur janë amnestuar kriminelët në veri poashtu në 2013, problemet i kemi kur është votuar Gjykata Speciale në 2015, problemet i kemi kur është themeluar Lista Serbe në bashkëpunim me Beogradin në vitin 2013, problemet i kemi kur politikanët e Kosovës kanë bërë qeveri duke u varur nga Lista Serbe e jo tek ky artikull ku manipulohet një kre tek i cili nuk ka fare autorësi”, tha Kurti.
Kurti tha se shpreson që nesër të konstituohet Kuvendit dhe Nenad Rashiq te zgjedhet nënkryetar i këtij institucuoni.
“Dimal Basha është kryetar i Kuvendit i cili ende nuk është konstituar shpresoj këtë ta bëjmë nesër ka ngelur edhe një nënkryetar të zgjedhet besoj që më së miri do të ishte të kryhet kjo çështje nesër duke e përzgjedhur aty Nenad Rashiqin i cili e pranon Republikën e Kosovës, punon për institucionet dhe është ministri që ka bërë më së shumti për komunitetin serb në vendin tonë”, tha ai.
I pyetur për dorëheqjen e Liburn Aliut dhe shkakun që dha ai për dorëheqje, kryeministri në detyrë, Albin Kurti teksa e falendëroi Aliun për kontributin e dhënë tha se duhet të vazhdohet përpara.
“E falendëroj ish ministrin, Liburn Aliu për kontributin e dhënë ne duhet të vazhdojmë përpara pa humbur kohë e kam emëruar në këtë detyrë zëvendësministrin, Hysen Durmishin… ne duhet të vazhdojnë përpara”, tha ai.
Kryetari i Kuvendit të Kosovës, Dimal Basha, e ka distancuar veten nga një artikull që flet kundër i Ushtrisë Çlirimtare të Kosovës (UÇK). Ai tha se distancohet nga çdo kush që ka shkruar kundër kësaj vlere. Ndërsa nga OVL UÇK kanë kërkuar dorëheqjen e Bashës nga pozita e kryekuvendarit.
E zgjedhja e Dimal Bashkës në krye të Kuvendit të Kosovës ishte shkak që ministri në detyrë i Infrastrukturës, Liburn Aliu të jap dorëheqje./kp
