Prilli i viti 1999 në Gjakovë ishte muaj i kobshëm.
Me qindra civilë shqiptarë u vranë u Mejë dhe në fshatrat e tjera përreth nga forcat serbe.
Por, me 14 prill të atij viti ndodhi një fatkeqësi e madhe.
Gjatë bombardimeve, aeroplanët e NATO-s aksidentalisht vranë 73 shqiptarë sipas versionit zyrtar të tyre.
Në mesin e të vrarëve ishin edhe dy vëllezërit e Markut, Lekë dhe Martin Hasanaj.
Megjithatë për këtë histori nuk është bindur edhe aq Marku nga fshati Mejë i Gjakovës.
Ai beson se vrasja shqiptarëve ishte e orkestruar nga inspektori famëkeq serb, Milutin Presheviq.
“Sa i përket masakrës së 14 prillit, që gjoja quhet bombardim aksidental i NATO-s, kjo është e pavërtetë. Unë jam i bindur dhe kam fakte se këtu nuk ka ndodhur asgjë aksidentalisht. Vrasjet kanë qenë të planifikuara mirë nga forcat serbe dhe të orkestruara nga inspektori famëkeq, Milutin Prasheviq. Bombardimet janë kryer nga dy aeroplanë të tipit MIG të Jugosllavisë”, tregon Mark Hasanaj.
Pas vrasjes së vëllezërve të tij, Mark Hasanaj rrëfen se vetëm pak ditë më vonë, në shtëpinë e tyre kishte ardhur vetë Milutin Prasheviqi.
“Tek shtëpia erdhi sërish, Milutin Prasheviqi. Ai e pyeti nënën time nëse iu kishin dhimbsur djemtë e saj”, rrëfen Hasanaj.
13 ditë më pas, më 27 prill 1999, forcat serbe kryen masakrën e Mejës, ku u vranë 376 shqiptarë të pambrojtur.
Një pjesë e trupave të viktimave janë gjetur; pjesa tjetër u ngarkua në kamionë dhe u transportua për në Serbi, ku u varrosën në varreza masive.
