Rruga për në Kosovë ju mbeti në gjysmë.
Dy burra, me lidhje familjare mes vete, që u nisën nga Gjermania, u ndaluan nga policia serbe në pikën kufitare Horgosh që lidh Serbinë me Hungarinë.
Tëvë1 mëson se të ndaluarit nga Serbia janë Bashkim Emini dhe Xhemajl Emini të cilët Serbia po i akuzon me pretendimet për veprën penale “ kryerje të krimeve ndaj popullatës civile serbe” gjatë vitit 1999.
Këtë e ka bërë të ditur, Ministria e Punëve të Brendshme të Serbisë, e cila ka bërë të ditur se të njëjtit janë ndaluar për 48 orë.
“Dyshohet se më 9 gusht 1999, në Rahovec, në bashkëpunim me disa anëtarë të të ashtuquajturës ‘UÇK’, me përdorimin e forcës fizike, armëve të zjarrit dhe kërcënimeve serioze për jetën dhe gjymtyrët, ata rrëmbyen një civil të kombësisë serbe, J. M., dhe e çuan në një drejtim të panjohur, që nga ajo kohë çdo gjurmë e tij është humbur. J. M. ende figuron si person i zhdukur. Të dyshuarve, me miratimin e prokurorit publik të Zyrës së Prokurorit Publik për Krime Lufte, u është urdhëruar paraburgimi deri në 48 orë”, thuhet nga MPJD.
Për arrestimin e familjarëve nga Serbia, ka reaguar nipi i tyre, Ervin Hoxha.
Ai në një deklaratë për Tëvë1, ka mohuar se dajallarët e tij kanë qenë pjesë e UÇK-së gjatë kësaj periudhe, sipas tij, të njëjtit kanë qenë në mërgim.
“Unë jam nipi i Bashkimit dhe Xhemajl Eminit dy personat të cilët sot janë arrestuar në pikën kufitare midis Serbisë dhe Hungarisë, në pikën kufitare Horgosh. Personat në fjalë nuk kanë qenë pjesë e Ushtrisë Çlirimtare të Kosovës, dhe për kohën që ata po akuzohen ata kanë qenë në mërgim. Unë personalisht nuk kom biseduar me ta, por familjari që është në Gjermani ka biseduar me një avokate në Serbi dhe ju është caktuar masa për ndalim 48 orësh”, ka thënë Hoxha.
Se Bashkim Emini dhe Xhemajl Emini nga Rahoveci nuk kanë qenë pjesë e Ushtrisë Çlirimtare të Kosovës, e thotë edhe Gazmend Syla nga OVL-UÇK.
“ Fillimisht ishte shqetësuese kur e kuptuam se janë arrestuar për faktin që këta kinse kanë kryer krime gjatë luftës në Kosovë, megjithatë një lehtësim na erdhi pasi që morëm informata nga terreni nga qyteti i Rahovecit nga strukturat tona të organizatës së veteranëve të luftës. Ata nuk gjenden në regjistrat e organizatës së OVL-UCK-së, nuk kanë qenë fare në Kosovë, në periudhën e luftës, edhe para luftës kanë qenë jashtë vendit në Gjermani”, kanë thënë nga OVL e UÇK-së
Syla ka shtuar se Ministria e Punëve të Jashtme e Kosovës duhet të bëjë më shumë për të arrestuarit që tashmë janë në Serbi.
E kryetari i Rahovecit, Smajl Latifi thotë se kjo familje është nga Rahoveci, ndërkaq akuzoi Serbinë për arrestimet e tilla.
“Ata janë nga Rahoveci janë të Familjes Emini, mirëpo mund të ju themi që sipas informacioneve që tash i kemi, nuk kanë qenë pjesë e Ushtrisë Çlirimtare të Kosovës. Serbia në vazhdimësi ka inskenuar ka improvizuar situata, ka krijuar probleme të paqena vazhdon aktivitetet kundër Republikës së Kosovës, dhe kundër bashkëkombësve tanë. Nuk pritet diçka e mirë e hajrit nga Serbia”, ka thënë ai.
Tëvë1 ka tentuar të marrë një përgjigje edhe nga Zyra Ndërlidhëse e Kosovës në Beograd, por nuk ka pranuar përgjigje.
