Presidenti ukrainas, Volodymyr Zelenskyy po përpiqet të mbledhë mbështetje ndërkombëtare përpara një samiti të rëndësishëm për fatin e Ukrainës, midis presidentit të SHBA-së, Donald Trump dhe presidentit rus, Vladimir Putin.
Takimi, i planifikuar të zhvillohet në Alaska të premten, nuk do të përfshijë Ukrainën ose aleatët kryesorë evropianë.
Kjo ka bërë që të ngjallen shqetësime se vendimet për të ardhmen e Ukrainës mund të merren pa vullnetin e plotë të saj.
Ky shqetësim e ka dërguar sot në Berlin, presidentin ukrainas, Volodymyr Zelenskyy, i cili u takua ballë për ballë me kancelarin gjerman, Friedrich Merz.
Të dy udhëheqësit zhvilluan takime virtuale me presidentin e SHBA-së, Donald Trump dhe një gamë të gjerë aleatësh evropianë.
Përgjatë një koference të përbashkët, Merz dhe Zelenskyy theksuan se “interesat themelore të sigurisë evropiane dhe ukrainase duhet të mbrohen” në takim.
“Interesat themelore të sigurisë evropiane dhe ukrainase duhet të mbrohen në Alaska. Ky ishte mesazhi që ne, si evropianë, i përcollëm Presidentit të SHBA-së Trump sot dhe mund të them se ishim në një mendje të gjerë si në vlerësimin tonë të situatës aktuale ashtu edhe në qëllimin e arritshëm për të premten e ardhshme”, tha Merz pas bisedës.
Kurse, presidenti ukrainas theksoj edhe njëherë se, “Çdo gjë që lidhet me Ukrainën duhet të diskutohet ekskluzivisht me Ukrainën,” duke bërë kërkesë për një takim të një formati trepalësh për bisedime.
Pas këtyre konsultimeve, liderët e BE-së dhe të NATO-s lëshuan deklarata në mbështetje të Ukrainës, duke theksuar se tani është radha e Rusisë për të vepruar.
Ata theksuan se Ukraina del më e fortë nga këto koordinime me partnerët perëndimorë.
Në prag të samitit, është bërë e ditur se presidenti amerikan ka refuzuar idenë e “shkëmbimeve territoriale”, një ide që kishte shkaktuar alarm në Kiev dhe në kryeqytetet evropiane.
Takimet, të organizuara nga Kancelari Merz, janë pjesë e një përpjekjeje të koordinuar evropiane për t’u siguruar që zëri i Ukrainës të dëgjohet – përpara se Trump dhe Putin të ulen në Alaska për samitin e tyre të parë në më shumë se një vit të mandatit./teve1/
