Trajneri Zekirija Ramadani e përshkroi ndeshjen në stadiumin “National Arena” si një ndeshje të çmendur.
Ramadani për humbjen 3:2 nga Steaua ia hodhi fajin mungesës së përqendrimit të ekipit të tij dhe me bindje të plotë tha se gabime të tilla nuk do të përsëriten në Prishtinë.
“Ishte një ndeshje e çmendur. Një humbje gjithmonë më rëndon rëndë mbi supet. Jam i kënaqur me mënyrën se si luajtëm për 60 minuta. Pastaj humbëm përqendrimin dhe pësuam tre gola, gjë që nuk ka ndodhur kurrë në ndeshjet e fundit”, tha Ramadani.
Javën tjetër, Drita në stadiumin “Fadil Vokrri” luan ndeshjen e kthimit dhe Ramadani paralajmëroi se ekipi i tij nuk do ti pranojë tri gola, por do ti shënojë.
“Ne njihemi si një ekip i disiplinuar, sepse shënojmë shumë dhe pranojmë pak gola. Po presim ndeshjen e kthimit dhe jemi të sigurt se nuk do të pranojmë tre gola, por padyshim që mund të shënojmë tre gola”, insistoi Ramadani në konferencën për shtyp.
Trajneri i ekipit kundërshtar, Elias Charalambous ishte i pakënaqur me humbjen e kohës nga lojtarët e Dritës gjatë ndeshjes por Ramadani tha se të dyja ekipet po humbnin kohë.
“Nëse ekipi im është i vetmi ekip që po humbet kohë, atëherë kërkoj ndjesë, por nëse ekipi im është vetëm një nga ekipet që po humbet kohë, atëherë është pjesë e lojës. Ne erdhëm këtu për të luajtur futboll, u sollëm si profesionistë dhe do të bëjmë të njëjtën gjë në Prishtinë. Ju ftoj të vini në ndeshje dhe patjetër do të habiteni nga tifozët tanë dhe atmosfera”.
Sipas tij, dy golat e shënuar nga Steaua mund të ishin shmnagur.
“Ndoshta nuk shfaqa asnjë emocion për dy golat e shënuar, në mënyrë që të mos ua përcillja këtë lojtarëve për t’i mbajtur të qetë. U përpoqa t’u përcillja mesazhin se ende nuk ka mbaruar. Përveç golit nga goditjet standarde, mendoj se dy të tjerët mund të ishin shmangur”, shtoi Ramadani.
Ramadani pret një shfaqje të vërtetë në Prishtinë javën e ardhshme.
“Tifozët i kemi afër, ata janë me ne edhe në momente të vështira, jam i sigurt se do të jenë atje në numër të madh. Mendoj se do të jetë një atmosferë festive, sepse me këtë rezultat gjithçka mund të ndodhë”, vazhdoi trajneri i Dritës.
Në fund të ndeshjes, mjekët nga ambulanca shkuan në dhomën e zhveshjes së Dritës.
Fillimisht, u mendua se ishte vetë Zekirija Ramadani, por ai shpjegoi se ishin për një anëtar të stafit të tij.
