Autor: Jona Kelmendi
Kanë kaluar tre javë prej kur punëtorët e sigurimit fizik të QKUK-së kanë hyrë në grevë.
Ata nuk janë më në detyrë, por çdo mëngjes qëndrojnë para ndërtesës së administratës së Qendrës Klinike Universitare të Kosovës, duke kërkuar kthimin në vendin e punës.
Këta punëtorë, para tre ditësh, kishin zhvilluar një takim me ushtruesin e detyrës së drejtorit të QKUK-së, Osman Hajdari, por i njëjti kishte përfunduar pa një epilog.
E 280 punëtorë të këtij sektori edhe këtë të enjte ishin sërish në të njëjtin vend.
“Në familjen tem unë punoj me gjithë djalë, na të tjera të ardhura nuk kemi, as nuk punon gruja, as reja, dmth krejt varet prej neve për çdo sen. Na kanë lanë shumë mungesë qeto 40 ditë se duhet rryma, uji, banka po na i lyp se kem kredia, kem smut, ajo nuk pot ve”, thotë Xhemajl Bajrami – grevist
Nëse nuk kthehen në punë deri të martën, ata paralajmëruan bllokim të administratës.
“Ne nuk na intereson se cili operator do të operoj këtu, ne kryesorja është që t’ia fillojmë punës, më së shumti deri të martën. Ne nëse nuk ja fillojmë punës deri të martën, na prej sot e kemi qit publik që të njoftohen edhe Policia që nëse të martën nuk ja nisim punës do të bllokojmë administratën si mbrenda nëse janë punëtorët që mos me i lanë me dal ose me ardhë me blloku që mos me i lanë me hi brenda. Kjo do të ndodh prej gjithë punëtorëve të sigurimit të cilët edhe kanë punu në QKUK”, thotë Hifzi Sylejmani, kryetar i sindikatës së punëtorëve të sigurimit.
Megjithatë përfaqësuesi i sektorit privat, Jusuf Azemi thotë se procesi është vonuar, teksa shpreson që tenderi i ri do ta zgjidhë këtë krizë.
“Realisht janë dy rrugëtime në aspekt ligjor. Mendoj që deri nesër në ora 12:00 këta punëtorë duhet ta kenë uniformën e tyre të veshur. Ndërsa në aspekt mbarëvajtjes qysh jemi shku deri tash nuk është mbet t’u besohet se të gjitha institucionet kanë rrejtur vetveten në rend të parë, por shpeshherë na kanë shty edhe neve që të devijojmë, por megjithatë sot është hapur tenderi me negocim. Shpresojmë të përfundojë deri nesër”, tha ai.
Pas ndërprerjes së kontratave nga Qendra Klinike Universitare e Kosovës, qindra punëtorë të cilët siguronin QKUK-në, kanë mbetur pa punë.
Televizioni ka dërguar pyetje edhe në QKUK, por deri në publikimin e kronikës nuk ka marrë një përgjigje.
