Pas gati dy vjetësh hetime, Federata e Futbollit të Anglisë ka konfirmuar vendimin për çështjen e ndalimit të Lucas Paquetas lidhur me pjesëmarrje të dyshuar në baste.
Vendimi zyrtar i federatës konfirmon se Paqueta është shpallur i pafajshëm nga Komisioni i Pavarur rregullator.
Në vendim thuhet se akuzat në lidhje me shkeljet e supozuara të nenit E5 të federatës nuk janë vërtetuar.
Paqueta u akuzua për katër raste të shkeljeve lidhur me sjelljen e tij gjatë ndeshjeve të Premier League kundër Leicester City (12 nëntor 2022), Aston Villa (12 mars 2023), Leeds United (21 maj 2023) dhe Bournemouth (12 gusht 2023).
Gjatë gjithë kohës, Paqueta i ka mohuar kategorikisht akuzat, duke deklaruar se situata i ka shkaktuar stres të madh emocional dhe fizik.
Në gusht të vitit 2023, FA nisi një hetim zyrtar ndaj yllit të West Ham United, pas vërejtjes së disa modeleve të dyshimta bastesh.
Gati një vit më vonë, në maj të vitit 2024, FA njoftoi se kishte ngritur akuza ndaj mesfushorit brazilian për dyshime se kishte qëllimisht provokuar për t’u ndëshkuar me karton të verdhë në katër ndeshje, duke shkelur rregullat e garës.
“U pretendua se ai qëllimisht kërkoi të ndëshkohej me karton nga gjyqtari për të ndikuar në tregun e basteve në mënyrë që një ose më shumë persona të përfitonin financiarisht”, thuhet në reagimin e FA.
