Fituesja e Kupës së Kosovës, Prishtina është e vendosur për të vazhduar rrugëtimin në kualifikimet e kupave evropiane.
E për ta bërë një gjë të tillë, Prishtinës i duhet ta eliminojë Larnen e Irlandës së Veriut në kuadër të raundit të dytë kualifikues të Ligës së Konferencës.
Sot, prej orës 20:00 në stadiumin “Fadil Vokrri” në kryeqytet, Prishtina luan ndeshjen e kthimit ndaj Larnes pas barazimit pa gola javën e shkuar në Irlandë të Veriut.
Për të avancuar në raundin e tretë kualifikues të Ligës së Konferencës, Prishtinës patjetër i duhet fitorja ndaj Larnes dhe për të arritur këtë e pret edhe përkrahjen e madhe të tifozëve.
Trajneri i Prishtinës, Arsim Thaqi në konferencën për shtyp, ka insistuar se ekipi i tij e ka parasysh rëndësinë e këtij dueli, të cilin patjetër duhet ta fitojnë.
Në fakt, Thaqi ka theksuar se e rëndësishme për Prishtinën që çështjen e fituesit të mbyllë brenda 90-të minutave, dhe jo të shkojë në vazhdime apo edhe në penallti.
Për dallim prej Prishtinës, te Larne kanë deklaruar se janë të gatshëm edhe për penallti vetëm për të avancuar tutje në kualifikimet e Ligës së Konferencës.
Prishtina garat evropiane këtë sezon i ka nisur prej raundit të parë kualifikues të Ligës së Evropës, ku u eliminua nga Sheriff Tiraspoli, ndërsa nëse e eliminon Larnen, atëherë në rrethin e tretë kualifikues të Ligës së Konferencës do të përballet me fituesin e duelit Santa Clara – Varazhdin.
