Driton Ajazi nga Partia Demokratike e Kosovës (PDK), në emisionin “Info Nata” në Tëvë1, ka folur rreth situatës në degën e kësaj partie në Drenas dhe kandidimit të Ramiz Lladrovcit si kandidat i pavarur, ndonëse PDK ka vendosur që në zgjedhjet e ardhshme lokale të garojë me Petrit Hajdarin.
Ajazi theksoi se Lladrovci për nëntë vite ka qeverisur në Drenas, por sipas tij, ai ka abuzuar me besimin e partisë.
“Lladrovci tash e 9 vite ka qeverisur në Drenas. Ai ka abuzuar me besimin e Partisë Demokratike të Kosovës, dhe këto janë të pafalshme. PDK-ja dhe lidershipi i saj kanë ardhur në përfundim se nuk mund të vazhdohet më me të,” tha Ajazi.
Ai shtoi se ishte pikërisht refuzimi i Lladrovcit për të pranuar vendimin e partisë që çoi në ndarjen përfundimtare.
“Ai nuk u pajtua me vendimin e PDK-së për ta kandiduar dikë tjetër, por janë qytetarët ata që do të vendosin,” shtoi ai.
I pyetur nëse e pret Lladrovcin një shkarkim nga pozita që ka në parti, Ajazi u shpreh i bindur.
“Patjetër që po. Ai aktualisht është ushtrues detyre i degës, por ka krijuar një strukturë sipas dëshirës së tij. Nuk ka logjikë të mbetet më në atë pozitë kur tashmë ka krijuar subjektin e tij politik. Ai nuk përfaqëson më PDK-në dhe besoj se lidershipi do të marrë vendimet e duhura,” përfundoi Ajazi.
