Misioni i NATO-s në Kosovë, KFOR ka thënë se i ka dhënë autorizime një FSK-së për të dërguar grupe kërkimi dhe shpëtimi në Liqenin Ujmanit ku një person që nga e diela po kërkohet pasi kishte kërcyer nga ura dhe nuk ishte dal më.
Në një komunikatë për media KFOR-i ka thënë se autorizimi për arsye humanitare është dhënë në përputhje me kompetenca e Komandantit ë KFOR-it.
“Sot, më 29 korrik 2025, Komandanti i misionit të KFOR-it të udhëhequr nga NATO, Major Gjeneral Enrico Barduani, autorizoi Forcën e Sigurisë së Kosovës (FSK) për të dërguar grupe kërkimi dhe shpëtimi (SAR) në zonën e liqenit të Ujmanit. Ky autorizim e dhënë për arsye humanitare, është dhënë plotësisht në përputhje me kompetencat dhe autoritetet e Komandantit të KFOR-it, me qëllim maksimizimin e përpjekjeve të vazhdueshme për të lokalizuar dhe shpëtuar një burrë 33 vjeçar, i cili dyshohet se është mbytur në liqen disa ditë më parë. Autorizimi është i kushtëzuar me kërkesa dhe kufizime specifike të vendosura nga KFOR, i cili gjithashtu do të sigurojë mbrojtje gjatë gjithë operacionit” – thuhet në komunikatë.
Për dërgimin e këtij ekipi të FSK-së në veri të vendit ka folur edhe ministri në detyrë i Mbrotjes, Ejup Maqedonci.
Ai ka thënë se ky ekip atje ka shkuar në bashkërendim me KFOR-in.
Sipas një marrëveshje ndërmjet Kosovës dhe NATO-s të vitit 2023, FSK nuk mund të shkojë në pjesën veriore të vendit të banuar me shumicë serbe pa miratimin e KFOR-it.
