Po shprehen tejet të zhgënjyer me mënyrën se si zhvillohet procesi gjyqësorë në Hagë ndaj ish-krerëve të UÇK-së.
Andaj një protestë gjithëpopullore është paralajmëruar të mbahet me 7 gusht kundër Gjykatës Speciale.
Kjo protestë po organizohet nga Organizata e Veteranëve të Luftës si dhe shoqatat e tjera të dala nga lufta.
Para gazetarëve, kryetari i OVL-UÇK-së, Hysni Gucati, tha mes tjerash se ish-krerët Ushtrisë Çlirimtare tash e 5 vjet po mbahen padrejtësisht në Hagë.
“Më datën 7 gusht, në ora 17:00, do ta organizojmë një protestë gjithëpopullore, protesta do të jetë karakter për shokët tonë që janë në Hagë që gjinden padrejtësisht në burg”, ka thënë Gucati.
Ndërsa, Kryetari i Shoqatës së Familjeve të Dëshmorëve, Xhavit Jashari, tha se lufta e drejtë e Kosovës po sulmohet nga Gjykata Speciale.
Jashari bëri thirrje që sa më shumë qytetarë të dalin në rrugë për të protestuar kundër Speciales.
“Të gjithë ata që e kanë marrë armën, të gjithë ata që iu kanë përgjigjur luftës së UÇK-së, madje edhe ata që e kanë ndihmuar këtë luftë janë brenda një aktakuze të padrejtë nga një gjykatë të cilën ju e dini, për arsye se po bën padrejtësi, ne nuk e kemi njohur”, është shprehur Jashari.
Gucati i lëshoi disa kritika edhe në drejtim të institucioneve të vendit.
Kujtojmë që edhe një protestë tjetër masive ishte mbajtur gjatë prillit të vitit 2023 ku më mijëra qytetarë dolën në rrugë për ta kundërshtuar Gjykatën Speciale.
