Një ngjarje tragjike ka goditur një fermer në fshatin Stublla e Poshtme të Komunës së Vitisë, ku një zjarr i madh ka përfshirë stallën e bagëtive, duke shkaktuar djegien e 42 deleve dhe dëme të mëdha financiare.
Pas kësaj ngjarjeje të rëndë, kryetari i Komunës së Vitisë, Sokol Haliti, ka vizituar familjen e fermerit të prekur, ku ka shprehur mbështetje të plotë dhe solidaritet me ta në këtë periudhë të vështirë.
“Do të merren masa të menjëhershme për të ndihmuar familjen në rikuperimin e dëmeve. Fermeri nuk do të mbetet vetëm,” thuhet në njoftimin zyrtar të Komunës së Vitisë.
Kryetari Haliti gjithashtu ka falënderuar njësinë e zjarrfikësve për reagimin e tyre të shpejtë, i cili ka bërë të mundur shpëtimin e jetës së një gruaje të familjes, duke parandaluar një tragjedi edhe më të madhe.
Autoritetet komunale kanë paralajmëruar se do të koordinohen me institucionet përkatëse për të ofruar ndihmë materiale dhe psikologjike për familjen e goditur, ndërsa gjithashtu janë duke u hetuar shkaqet e zjarrit.
