Të premten ka dështuar edhe përpjekja e 45-të për ta konstituuar Kuvendin e Republikës së Kosovës.
Ngjashëm sikurse në seancat e kaluara, kryesuesi i Kuvendit, Avni Dehari nuk lejoi debat mes ligjvënësve duke ua ndalur mikrofonin.
Në një moment pati edhe konfrontim verbal mes deputetes Time Kadrijaj dhe Fitore Pacollit.
Nga 93 deputetë që ishin të pranishëm në sallë vetëm 49 prej tyre votuan për, dhe nuk pati asnjë votë kundër e abstenim për votimin e Komisionit të fshehtë.
Partitë e deritashme opozitare pas përfundimit të seancës vazhduan të qëndrojnë brenda në Kuvend duke mbajtur fjalime.
“Sot kemi të bëjmë më një përpjekje të qartë për të shtypur pluralizmin politik, për të uzurpuar pushtetin përmes kontrollit total mbi institucionet e Republikës së Kosovës”, deklaroi Blerta Deliu-Kodra nga PDK-ja.
Deputeti i Lidhjes Demokratike të Kosovës Ekrem Hyseni, akuzoi Vetëvendosjen për uzurpim të institucioneve.
