Në këto varreza të Potoçarit të Bosnje dhe Hercegovinës, në mesin e mijëra viktimave prehen vëllezërit dhe babai i Mevludin Hrnjiqit.
Ky i fundit i mbijetoi i gjenocidit të Srebrenicës dhe më pas me laps në dorë vendosi t’i rrëfej botës për krimet e llahtarshme që forcat serbe kryen ndaj myslimanëve boshnjakë.
Hrnjiq tha se Srebrenica mbetet një plagë e hapur për shumë familjarë ndërsa pati kritika edhe për faktorin ndërkombëtar.
“Unë jam njëri prej atyre që e kam përjetuar gjenocidin në Srebrenicë dhe kam mbetur si dëshmitarë i atyre ngjarjeve të tmerrshme. Srebrenica është një plagë e madhe për të gjithë ne. Kjo është një njollë e zezë edhe për Bashkësinë Ndërkombëtare që dështoi t’i mbrojë civilët. Ata u vranë vetëm se ishin myslimanë” , ka thënë Hrnjiq
Prezent në promovimin e librit të Hrnjiqit për gjenocidin në Srebrenicë ishte edhe kryeministri në detyrë, Albin Kurti.
Kurti para të pranishmëve tha se shqiptarët e Kosovës i kuptojnë shumë mirë plagët e boshnjakëve sepse i kanë përjetuar nën lëkurën e tyre mizoritë e regjimit serb.
“Nën komandën e Ratko Mlladiqit, forcat serbe vranë 8372 burra dhe djem boshnjakë. Më shumë se masakër ishte përpjekje për të zhdukur një popull, një kulturë dhe një frymë. Ishte gjenocid. Gjenocidi në Srebrenicë është krim që i përket të gjithë njerëzimit. Dhimbje që nuk njeh kufij dhe përgjegjësi që nuk mund të harrohet. Në Kosovë çdo korrik e kujtojmë Srebrenicën si plagë që flet edhe për ne, sepse sikurse boshnjakët edhe shqiptarët e Kosovës përjetuan në të njëjtën dekadë egërsinë dhe mizorinë e regjimit serb” , ka thënë Kurti.
Kurse, kryetari i Bashkësisë Islame të Kosovës, Myftiu Naim Tërnava, deklaroi se para syve të botës u vranë mbi 8.000 burra dhe djem vetëm pse i përkisnin një besimi dhe etnie tjetër.
“Ngjarjet e korrikut të vitit 1995 në Srebrenicë nuk janë një tragjedi e izoluar por një akt i qëllimshëm gjenocidi i orkestruar me synimin për zhdukjen e boshnjakëve vetëm pse i përkisnin një etnie dhe besimi tjetër. Mbi 8.000 burra dhe djem u makruan, shumë gra u përdhunuan dhe mijëra familje u shpërngulen para syve të botës”, ka thënë Tërnava.
Masakra e Srebrenicës është shpallur gjenocid nga Gjykata Ndërkombëtare për Krime në Ish-Jugosllavi dhe Gjykata Ndërkombëtare e Drejtësisë, por këto krime kundër njerëzimit janë mohuar në vazhdimësi nga udhëheqësit serbë në Bosnjë dhe Serbi.
