Policia e Kosovës ka njoftuar se në orët e para të së shtunës ka pranuar një mesazh për një kërcënim me mjet shpërthyes në objektin e Kuvendit të Kosovës.
Policia ka bërë të ditur se njësitë kompetente policore kanë bërë perimetrin e sigurisë dhe kanë evakuuar deputetët dhe mediat nga objekti.
Siç thuhet në njoftimin e policisë, prokuroria dhe hetuesit policor së bashku me njësitet dhe ekspertët përkatës për dominim janë duke u marrë me veprimet e duhura.
“Sot, me datë 05.07.2025 në orët e paradites, është pranuar një informatë (me sms), për një kërcënim me mjet shpërthyes në objektin shtetëror të RKS-së. Me të pranuar informatën, janë angazhuar njësitë kompetente policore, të cilat fillimisht kanë bërë perimetrin e sigurisë dhe kanë evakuuar personat nga objektet. Policia e Kosovës ka njoftuar prokurorinë kompetente dhe hetuesit policorë të cilët së bashku me njësitë dhe ekspertët përkatës për deminim, janë duke marrë veprimet e duhura të kontrollit në objekt”, thuhet në njoftimin e Policisë./teve1.info/
