Presidentja e Kosovës, Vjosa Osmani, ka rifilluar përpjekjet për të zgjidhur ngërçin politik që ka bllokuar konstituimin e Kuvendit.
Shefja e shtetit do të nis sot takimet me liderët e partive politike, me synimin për të gjetur një zgjidhje që do të çonte drejt tejkalimit të krizës institucionale, me të cilit do të takohet me secilin në mënyrë individuale.
Kryetari i PKD-së, Memli Krasniqi, ka konfirmuar se do të takohet me presidenten, derisa ka theksuar përkushtimin për gjetjen e një zgjidhjeje.
“Qëndrimi ynë është ai që kemi pasur gjithmonë. Ka dy tre muaj që mundohemi me gjetë zgjidhje me ofru kompromise, për të dal nga kjo situatë. Nesër prapë do të jem tek presidentja. Këtë e shoh pozitive në kuptimin e angazhimit, por s’di çka të them për mundësinë e rezultatit. Sepse bllokada është prodhim i kryeneqësisë politike të VV-së”, ka deklaruar Krasniqi.
Pas tij, presidentja do ta takojë edhe kryetarin e LDK-së, Lumir Abdixhiku, ndërsa në orën 16:00 është planifikuar takimi me liderin e AAK-së, Ramush Haradinaj.
Në mesin e të ftuarve është edhe kryeministri në detyrë, Albin Kurti, i cili ka konfirmuar pjesëmarrjen në takim.
Takimet me përfaqësuesit e partive të komuniteteve joshumicë pritet të mbahen një ditë më pas. Deputetja nga komuniteti boshnjak, Duda Balja, ka bërë të ditur se ka marrë ftesë nga presidentja Osmani dhe se takimi do të zhvillohet të enjten në orën 11:30.
