Profesori universitar, Nexhmedin Spahiu ka deklaruar se situata në veri të Kosovës nuk mund të tensionohet vetvetiu nga serbët, nëse shqiptarët nuk i nxisin ata me veprime provokuese.
Sipas Spahiut, provokime të tilla si vendosja e një flamuri të UÇK-së mbi banesat pranë urës që po ndërtohet janë krejtësisht të panevojshme.
“Nuk mund të priten tensione. Në fakt ka disa që bëjnë provokime palidhje, si për shembull disa aty te vendi ku u shtru gurthemeli i urës e kanë vendosur mbi banesë një flamur të madh të UÇK-së që bie karshi banesave të serbëve dhe kjo tek ndërkombëtarët që janë aty, sidomos xhandarmëria që ruan aty në Urë të Ibrit e shikonin si çfarë po i u duhet kjo? Pse duhet të provokohet situata nëse ura është një nevojë për t’u kaluar? Çka duhet një flamur i cili e ka vendin në muze. Pse duhet ai me dal aty në vendin ku do të hapet një urë e re? Kështu që këto gjëra palidhje sigurisht që duhet të evitohen. Nuk mundet me u tensionu situata vetvetiu nga ana e serbëve po që se nuk ‘çohen peshë’ shqiptarët dhe prej budallakut të tyre shkojnë e bëjnë veprime provokuese që nxisin edhe qytetarë të thjeshtë e të paorganizuar me reagu”,ka thënë ai në emisionin “Info Nata” në Tëvë1.
Ai tutje ka shtuar se edhe pas hapjes së urës kryesore, nuk duhet të lejohet asnjë manifestim që mund të nxisë tensione.
“Unë besoj që edhe kur të hapet ura kryesore nuk duhet lejuar manifestime të cilat bëjnë parada manifestive mbi urë sepse është krejtësisht e panevojshme. Ura do të hapet normalisht policia do të duhet të qëndroj aty dhe të jap dënime me gjobë…”, ka theksuar Spahiu.
