Gjykata Themelore e Prishtinës ka marrë një vendim për rastin e gazetarit Valon Syla, i cili dyshohet se ushtroi dhunë fizike ndaj partneres së tij.
Gjykata ia ka vendosur Sylës një masë të sigurisë, duke ia ndaluar atij që t’i afrohet dhe të kontaktoj me viktimën.
Për këtë rast, ka reaguar edhe Rrjeti i Grave të Kosovës, duke kërkuar nga institucionet e drejtësisë të veprojë në bazë të ligjit.
“Rrjeti i Grave të Kosovës e dënon ashpër rastin e të akuzuarit që është akuzuar për dhunë në familje ndaj të dashurës dhe bashkëjetueses së tij. E në anën tjetër fton të gjitha institucionet që të veprojnë konform dispozitave ligjore në mënyrë që personi në fjalë të marrë dënimin e merituar”, ka thënë Breznica.
E se duhet të ashpërsohet ligji e thotë edhe avokati, Ardian Bajraktari.
“Kur kemi parasysh faktin që ky fenomen po përsëritet po është në masë të konsiderueshme i shprehur, atëherë është e nevojshme të shikohet politika ndëshkimore që të arrihet qëllimi i parandalimit të këtij fenomeni. Dhuna në familje është vepër e veçantë penale në referencë të dispozitave të Kodit Penal, shkalla e ndëshkueshmërisë e cila është me burgim por njëkohësisht edhe me gjobë, dënimi me burgim është deri në tri vite”, ka thënë Bajraktari.
Në Kosovë, që nga fillimi i muajit janar e deri në mars, janë shënuar qindra raste të dhunës në familje.
“677 raste të dhunës në familje të raportuara në Polici për periudhën janar – mars 2025, ku Prishtina prinë me numrin më të madh të rasteve e që janë 237, duke vazhduar më pas Peja me 92 raste”m thuhet në grafikën e Policisë së Kosovës.
Sipas psikologes Atifete Syla, shkaktarët e dhunës janë të ndryshëm.
“Në vendin tonë ndikon shumë kultura edhe tradita. Ku ne e dimë që rrjedhim prej një kulture maskiliste, ku zakonisht burrat janë ata që marrin vendimet ata që ushtrojnë dhunën. Ka shumë faktorë, mos të harrojmë qe ne jemi shoqëri e pasluftës edhe ato trauma nuk janë trajtuar e nuk janë rikuperuar hiç. Pastaj, jemi shoqëri në tranzicionë kemi një diferencim të mendësisë së të rinjve dhe të moshuarve”, ka thënë Syla.
Në Kosovë për gjatë 24 orëve të fundit janë shënuar katër raste të dhunës në familje.
