Kryetarët e shteteve dhe delegacioneve të Procesit të Bashkëpunimit të Evropës Juglindore (SEECP) mbërrijnë këtë të hënë në Tiranë në kuadër të samitit që do të mbahet në Shqipëri.
Samiti ka në fokus të tij forcimin e bashkëpunimit rajonal, përshpejtimin e procesit të integrimit në BE dhe promovimin e zhvillimit të qëndrueshëm.
Do të jetë presidenti, Bajram Begaj ai i cili do të presë kryetarët e shteteve dhe delegacioneve të Procesit të Bashkëpunimit të Evropës Juglindore (SEECP).
Presidenti Begaj në mbyllje të samitit do t’i kalojë homologut të tij bullgar, presidentit Radev, kryesinë e radhës të SEECP-së.
Veç mikpritjes së samitit, Begaj pritet të zhvillojë takime të veçanta me homologë e liderë pjesëmarrës të procesit të SEECP-së për të thelluar më tej bashkëpunimin e Shqipërisë me këto vende.
Pse është i rëndësishëm SEECP?
Përcakton çdo vit prioritete rajonale në diplomaci, zhvillim, siguri dhe energji.
Promovon bashkëpunimin e ngushtë mes vendeve pjesëmarrëse për integrim drejt Bashkimit Europian.
I jep vendit një rol kryesor diplomatik dhe forcon imazhin ndërkombëtar të Shqipërisë.
SEECP është një platformë e rëndësishme e Bashkëpunimit Rajonal dhe e Integrimit Europian.
Shqipëria si kryesuese e radhës e SEECP për periudhën qershor 2024 – korrik 2025 nën sloganin “Formësimi i së ardhmes sonë evropiane” ka kontribuuar në forcimin e bashkëpunimit rajonal, për zbatimin e objektivave të Tregut të Përbashkët Rajonal, si dhe duke përshpejtuar procesin e integrimit evropian.
Samiti i SEECP që do të mbahet të hënën në Tiranë do të shërbejë për nxitjen e Stabilitetit dhe Prosperitetit me ndikim pozitiv në jetën e qytetarëve dhe integrimin në BE.
Në këtë kontekst, liderët pjesëmarrës synojnë që në këtë samit të shprehin angazhim për të forcuar më tej rolin e SEECP-së.
Gjithashtu, ata do të paraqesin përfundimet e samitit në një deklaratë të përbashkët.
