Në shtëpinë e kulturës “Xhavit Haziri”, në Obiliq është mbajtur manifestim kulturor, për të shënuar 26-vjetorin e Ditës së Çlirimit të kësaj komune.
Kryetari i Obiliqit, Xhafer Gashi tha se kjo ditë simbolizon përpjekjet e vazhdueshme të popullit për liri, drejtësi dhe dinjitet.
“Nga qëndresat e para, e deri te vitet vendimtare të lavdisë kombëtare nga viti 1998 dhe 1999 kur populli shqiptar u ngrit si një trup i vetëm, nën flamurin e Ushtrisë Çlirimtare të Kosovës, për të fituar lirinë dhe për t’i dhënë fund robërisë. Në këtë ditë të shenjtë, ne përulemi me respekt para sakrificës së madhe të dëshmorëve dhe martirëve të lirisë. Nderojmë veprimtarët, idealistët, të rinjtë, studentët e të gjitha kohërave ata që jetën e tyre ia kushtuan atdheut. Nderojmë presidentin historik Dr. Ibrahim Rugova, figurë e unitetit dhe vizionit për shtetin tonë. Nderojmë komandantin legjendar, Adem Jashari dhe familjen e tij heroike – simbolin më të lartë të sakrificës për lirinë e Kosovës”, deklaroi ai.
Ai ka nderuar familjet heroike të dëshmorëve dhe invalidët e luftës.
“Lufta e Ushtrisë Çlirimtare të Kosovës ishte e drejtë dhe e pastër. Këtë e dëshmoi edhe përkrahja e madhe nga miqtë tanë ndërkombëtarë nga Shtetet e Bashkuara të Amerikës, NATO dhe të gjithë aleatët tanë besnikë. Sot, në 26-vjetorin e çlirimit, kemi arsye për të qenë krenarë. Sepse së bashku kemi punuar për zhvillimin e qytetit tonë. Obiliqi sot ka hapësira të përshtatshme për të rinjtë, ka arsim më cilësor, më shumë aktivitete kulturore dhe sportive, shërbime më të mira shëndetësore dhe infrastrukturë moderne. Obiliqi është qytet i sportit, i kampionëve dhe i së ardhmes”, shtoi ai.
Para të pranishmëve, Gashi tha se dëshmorët kanë lënë amanet për punë të përbashkët.
“Dëshmorët që sot i kujtojmë, na e kanë lënë një amanet të shenjtë “Të mbajmë gjallë kujtimin për ta dhe të punojmë të bashkuar për të ardhmen e vendit tonë. Le të frymëzohemi nga heroizmi i tyre. Le të punojmë çdo ditë për ta bërë Kosovën tonë, më të zhvilluar”, përfundoi ai.
Për shënimin e 26-vjetorit të Ditës së Çlirimit të Obiliqit, është mbajtur edhe mbledhje solemne e Kuvendit Komunal dhe homazhe pranë pllakës përkujtimore të dëshmorëve.
