Ka nisur seanca e dytë gjyqësore ndaj tre të akuzuarve për sulmin terrorist në Banjskë të Zveçanit, ku mbeti i vrarë rreshteri i Policisë së Kosovës, Afrim Bunjaku, në shtator të vitit 2023 .
Në këtë seancë e cila po mbahet në Gjykatën Themelore në Prishtinë pritet të dëgjohen dëshmitarët e parë Alban Rashiti dhe Çlirim Shaqiri, pjesëtarë të Njësisë Speciale të Policisë së Kosovës që ishin përballur me terroristët.
Ndryshe, në shqyrtimin fillestar të mbajtur më 9 tetor 2024, tre të akuzuarit Vladimir Toliq, Blagoje Spasojeviq dhe Dushan Maksimoviq janë deklaruar të pafajshëm.
Përveç tyre të akuzuar për këtë sulm janë edhe 42 persona të tjerë që gjenden në arrati, përfshirë edhe Milan Radojiçiqin, që e pranoi publikisht se udhëhoqi sulmin në Banjskë.
Më 11 shtator të 2024, Prokuroria Speciale e Kosovës ngriti aktakuzë kundër 45 personave në krye me kriminelin Milan Radoiiciq, të cilët akuzohen për terrorizëm, financim të terrorizmit dhe vepra të tjera të rënda penale.
Autoritetet e Kosovës kanë kërkuar ekstradimin e përgjegjësit të grupit terrorist, Milan Radoiçiq dhe të akuzuarit tjerë për sulmin terrorist në Banjskë të Zveçanit, mirëpo një gjë e tillë ende nuk ka ndodhur.
Ata janë në kërkim të INTERPOLIT e presion ndaj Serbisë, që ajo t’ia dorëzojë Milan Radojçiqin dhe kriminelët tjerë drejtësisë së Republikës së Kosovës është bërë edhe nga ndërkombëtarët.
Vazhdon sot gjykimi ndaj tre të akuzuarve për sulmin terrorist në Banjskë
