Punën e kryejnë normalisht. Por mbi njëmijë profesionistë shëndetësorë së bashku me stafin mbështetës që u angazhuan si pjesë e luftës kundër COVID-19, ende nuk i kanë marrë pagat e marsit dhe të prillit. Ata druajnë se nuk do t’i marrin pagat as për muajin maj.
Mirëpo, për të diskutuar rreth kësaj çështjeje, profesionistët e kësaj kategorie nuk kanë parapëlqyer të flasin para kamerës.
Megjithatë, një nga inspektorët sanitarë i tha televizionit se ankesat e tyre i kanë adresuar në Ministrinë e Shëndetësisë, atë të Financave dhe në Agjencinë e Ushqimit e Veterinarisë, mirëpo deri më tani nuk u është bërë zgjidhje.
Se kur do t’u ekzekutohen pagat mbi një mijë profesionistëve nuk kanë bërë të ditur as nga Ministria e Shëndetësisë. Megjithatë nga ky institucion kanë thënë se po konsultohen me Ministrinë e Financave që t’i gjejnë modalitetet për kryerjen e pagesave.
“MSh dhe MF janë në konsultime të vazhduara rreth gjetjes së një modaliteti për kryerjen e pagesave për stafin e angazhuar për ballafaqim me COVID-19. Përfaqësuesit e këtij stafi janë njoftuar në takim në MSh për këtë çështje. Gjithashtu, të njëjtit do të njoftohen me kohë rreth zgjatjes ose jo te kontratave pas përmbushjes së kontratave aktuale që përfundojnë në qershor”, thuhet në përgjigjen e Ministrisë së Shëndetësisë.
Infermierët dhe stafi mbështetës kanë paralajmëruar edhe protestë shkaku i mosekzekutimit të pagesave. Protesta do të zhvillohet nesër në orën 10:00 para Ministrisë së Shëndetësisë.
Raporti i gazetarit Gojart Jashari.
