Presidentja e Kosovës, Vjosa Osmani sot në cilësinë e Komandantes Supreme të FSK-së ka vizituar “Defender Europe 25”, ushtrimin më të madh të këtij viti të US Army Europe.
Në këtë ushtrim, Kosova jo vetëm që do të marrë pjesë, por do të jetë edhe nikoqire.
“Sot, në cilësinë e Komandantes Supreme të Forcës së Sigurisë së Kosovës, vizitova Defender Europe ’25 – ushtrimin më të madh të këtij viti të US Army Europe, ku Kosova jo vetëm që merr pjesë, por ka edhe nderin të jetë nikoqire. Krah për krah me forcat e armatosura të Shteteve të Bashkuara të Amerikës dhe aleatëve tjerë të NATO-s, vendi ynë po shkruan një kapitull të ri të bashkëpunimit ushtarak ndërkombëtar”, ka shkruar presidentja.
E para e vendit ka thënë se rreth 1000 pjesëtarë të FSK-së janë të angazhuar me aleatët nga vendet më të fuqishme të botës.
Madje, ajo tha se Kosova jo vetëm që kontribuon, por është e gatshme të jetë pjesë e NATO-s.
“Vetëm dy ditë më parë, në SHBA, diskutuam për vizionin e përbashkët për mbrojtjen e Evropës. Sot, ky vizion po zbatohet në terren, në tokën tonë, përmes Defender Europe ’25 – një ushtrim i përmasave të jashtëzakonshme që dëshmon përkushtimin ndaj paqes dhe sigurisë. Rreth 1000 pjesëtarë të FSK-së janë të angazhuar drejtpërdrejt – profesionistë të barabartë me aleatët nga vendet më të fuqishme të botës. Ky është një mesazh i qartë: Kosova jo vetëm që kontribuon, por është e gatshme të jetë pjesë e NATO-s”, tha ai ndër të tjera./teve1.info/
