Kompania “Pastrimi” ka njoftuar se ka nënshkruar kontratë me Komunën e Prishtinës për mirëmbajtjen e hapësirave si parqet, hapësirat publike, por nuk ka marrëveshje sa i përket menaxhimit të mbeturinave.
Nga kjo kompani kanë thënë se mirëpresin marrëveshjen për këtë marrëveshje dhe kërkojnë bashkëpunim për zgjidhje afatgjate të pastrimit.
“KRM “Pastrimi” e vlerëson çdo përpjekje për fillimin e bashkëpunimit dhe angazhimit në adresimin e situatës së krijuar me largimin e mbeturinave. Sqarojmë që Kontrata për mirëmbajtje të hapësirave sipërfaqësore e nënshkruar nga dy palët ka të bëjë mirëmbajtjen dhe pastrimin e hapësirave sipërfaqësore, si parqet, hapësirat publike të lagjeve dhe zona të tjera të ngjashme, dhe përbënë shërbim krejtësisht tjetër nga problematika bazë”, thuhet në komunikatë.
Nga kjo kompani i kanë bërë thirrje zyrtarëve të Komunës që të ketë dialog urgjent për kontratën e menaxhimit të mbeturinave.
“Megjithatë, kjo kontratë nuk e adreson problemin themelor, i cili ka të bëjë me shërbimin primar të largimit të mbeturinave nga qyteti, si dhe me pagesat e papaguara për më shumë se katër muaj. Këto mjete janë thelbësore për të siguruar furnizimin me naftë dhe për të rifilluar menjëherë operimin e rregullt, duke garantuar gjithashtu edhe stabilitet financiar afatgjatë. Prandaj, kërkojmë nga Komuna që të ulemi urgjentisht për të zgjidhur çështjen themelore – kontratën për shërbimet bazë dhe obligimet financiare të papaguara deri tani – në mënyrë që t’i kthehemi sa më parë normalitetit dhe ofrimit të shërbimeve për qytetarët e Prishtinës”, thuhet në komunikatë./teve1.info/
