Organizata e Veteranëve të UÇK-OVL-së ka reaguar në lidhje me deklaratën e kryetares së Dhomave të Specializuara në Hagë, Ekaterina Trendafilova e cila ka thënë se Gjykata Speciale është e “fokusuar në përmbushjen e mandatit për drejtësi të pavarur”.
Për këtë, OVL-UÇK ka theksuar se Trendafilova duhet ta dijë se në Kosovë, ligjet i miraton Kuvendi, duke thënë se Dhomat e Specializuara nuk kanë pushtet mbi institucionin që i themeloi.
“Trendafilova duhet ta dijë se t’i mbash leksione Kuvendit për sundimin e ligjit, përderisa e trajton interpretimin personal si të padiskutueshëm, është arrogancë. Kritika ndaj vendimeve gjyqësore është e drejtë legjitime dhe nuk do të heqim dorë prej saj. Asnjë vendim gjyqësor nuk mund ta fshijë të vërtetën se Lufta Çlirimtare ishte e drejtë”, thuhet në reagimin e OVL-UÇK-së.
Ndërkohë, OVL-UÇK theksoi se lirinë e Kosovës e fituan ata që u ngritën kundër gjenocidit dhe shtetësia e Kosovës qëndron mbi sakrificën e tyre.
“Andaj, gjykatat asnjëherë nuk duhet të shndërrohen në institute historie, por duhet që me dinjitet e profesionalizëm ta kryejnë punën për të cilën janë mandatuar. Fatkeqësisht, në rastin e Dhomave të Specializuara kanë munguar që të dyja, edhe dinjiteti, edhe profesionalizmi”, tha OVL-UÇK-së./teve1.info/
