Sekretarja e PDK-së, Vlora Çitaku ka kritikuar kryetaren e Dhomave të Specializuara të Kosovës në Hagë, Ekaterina Trendafilova, duke kërkuar llogaridhënie dhe përgjigje konkrete për shqetësimet lidhur me punën e kësaj gjykate.
Në reagimin e saj, Çitaku ka thënë se një video-adresim pa mundësi për pyetje nga gazetarët nuk mjafton për t’iu përgjigjur kritikave dhe shqetësimeve të ngritura ndër vite.
Ajo ka përmendur si shqetësime mungesën e transparencës, llogaridhënien e pamjaftueshme dhe mangësitë në mbikëqyrjen e procesit gjyqësor.
“Pavarësia nuk ju vendos mbi ligjin. Prejardhja ndërkombëtare e gjyqtarëve nuk është certifikatë pagabueshmërie. As titujt, as betimet dhe as videot nuk e zëvendësojnë profesionalizmin dhe drejtësinë që duhet të dëshmoni në vendimet tuaja”, ka shkruar Çitaku.
Ajo i ka bërë thirrje Trendafilovës që të përballet me gazetarët dhe t’u përgjigjet pyetjeve të vështira për mënyrën e drejtimit të gjykatës.
Çitaku ka theksuar se kritikat nuk duhet të cilësohen si dezinformim pa u trajtuar shqetësimet që qëndrojnë pas tyre.
Në reagimin e saj, sekretarja e PDK-së ka shprehur gjithashtu mbështetjen për mbrojtjen e ish-krerëve të UÇK-së në procesin e apelit, duke thënë se Kosova do ta kundërshtojë çdo padrejtësi përmes mjeteve ligjore dhe institucionale.
“Kërkojmë drejtësi për çlirimtarët! Sepse padrejtësia nuk bëhet drejtësi vetëm pse shqiptohet në Hagë”, ka përfunduar Çitaku.
