Kryetarja e Dhomave të Specializuara, Ekaterina Trendafilova, ka reaguar pas miratimit të Ligjit për Speciale.
Përmes një video, ajo ka folur për pavarësinë e gjykatës, mbrojtjen e dëshmitarëve dhe viktimave.
Në adresimin e saj, ajo ka folur për procesin e themelimit të Dhomave të Specializuara, duke thënë se askush nuk mund të ndërhyjë në vendimin e gjykatësve.
“Dhomat e Specializuara janë përballur me dezinformata lidhur me pavarësinë dhe funksionimin e tyre. Gjithashtu, ka pasur përpjekje për të penguar rrjedhën e drejtësisë, të cilat kanë çuar në dënime dhe pranime të fajësisë për frikësimin e dëshmitarëve para gjykatës. Dhomat e Specializuara janë një institucion gjyqësor me mandat të përcaktuar përmes një shkëmbimi letrash, Kushtetutës së Kosovës dhe Ligjit për Dhomat e Specializuara dhe Zyrën e Prokurorit të Specializuar. Gjykata është e përqendruar në sigurimin e procedurave penale të sigurta, të pavarura, të paanshme, të drejta dhe efikase, duke siguruar njëkohësisht mbrojtje të fuqishme për dëshmitarët dhe viktimat”, ka deklaruar ajo.
Ndër të tjera, ajo ka bërë me dije se të pandehurit që pretendojnë për shkelje të të drejtave mund të ankohen në Dhomën e Specializuar të Gjykatës Kushtetuese.
