Ka ditë që këtu nuk mund të hyjë askush.
Kjo pasi, që nga e marta, kishës ortodokse në fshatin Rakinicë të Podujevës, i është vënë dryri.
E ky veprim, sipas dyshimeve fillestare, është bërë nga disa klerikë serbë.
Klerikë fetar serbë ditë më parë erdhën këtu dhe të njëjtit dyshohet që vendosën ketë dry në kishën ortodokse këtu në fshatin Rakinicë të Podujevës.
Se klerikët serbë ishin aty dy ditë më parë, i thanë televizionit prapa kamerës edhe disa banorë të këtij fshati.
Madje sipas tyre, deri të martën dera ishte e hapur.
Por, sipas dyshimeve, klerikët pasi kishin qenë për vizitë në kishë, ishin paraqitur në stacionin policor të Podujevës, ku kishin deponuar kallëzim penal ndaj një kleriku shqiptar.
Një gjë të tillë e ka konfirmuar Policia e Kosovës, por pa dhënë detaje shtesë.
“Me datën 20 maj, Policia e Kosovës ka pranuar një nga pala ankuese dhe të njëjtën e ka referuar në Prokurorinë përkatëse”, thuhet nga Policia.
E për gjithë këtë situatë, nuk është në dijeni kryepeshkopi i kishës ortodokse shqiptare në Kosovë, Nikolla Xhufka.
“Nuk kemi ndonjë njoftim zyrtar nga komisariati i Podujevës dhe ndoshta kjo mund të ishte dhe inekzistente, diçka që nuk ka ndodhur, nuk dimë ende asgjë. Vazhdimisht kemi pasur problem me Kishën ortodokse serbe, pasi Kisha serbe thotë se kush është ortodoks, është serb, por kjo nuk është e vërtetë”, thotë Xhufka për Tëvë1.
Madje ai thotë se nuk është i informuar as për kallzimin penal që është bërë.
“Nuk e di për cilin klirik fetar bëhet fjalë, por nuk kemi marrë asnjë njoftim zyrtar për ndonjë padi apo kallëzim penal për kyepeshkopatën në Prishtinë”, shprehet ai.
Banorët e kësaj zone, thonë se kisha ka një historik qindra vjeçar.
“Sipas të dhënave të modeme unë e di që ajo kishë është shumë e vjetër, sa një kohë nuk e kanë ditë që ekziston, dikur është zbuluar, por kanë thënë që është kishë e fesë katolike. Serbë ka pas shumë ksajde dhe e kanë përdor si kishë të tyre”, shprehet Nazif Rrahimi – banor i fshatit Orllan.
Tëvë1 ka tentuar të marrë një përgjigje edhe nga Prokuroria Themelore në Prishtinë, por të njëjtit nuk kanë kthyer përgjigje.
