Kandidatja për Kryetare të Kuvendit nga LVV-ja, Albulena Haxhiu shpreson që sot në seancën e 19-të për konstituimin e Kuvendit, të votohet komisioni për votim të fshehtë.
Haxhiu ka thënë se përgjegjësia për të dalë nga kjo situatë dhe për t`u bërë konstituimi i Kuvendit i mbetet opozitës.
“Është kërkesa e kryesuesit të seancës që të votohet komisioni për votim të fshehtë dhe urojmë që sot opozita të marrë pjesë në votim sepse besoj që është jashtëzakonisht e rëndësishme që të respektohet ligji i Gjykatës Kushtetuese. Çka do çka është varë nga LVV-ja ne e kemi bërë, përgjegjësia mbetet tek opozita dhe siç kam thënë në të kaluarën uroj që të reflektoj në mënyrë që të dalim nga kjo situatë dhe të konsistojë Kuvendin”, ka deklaruar Haxhiu.
Ndryshe, Sot do të mbahet edhe një seancë në përpjekje të konstituimit të Kuvendit.
Seanca e së mërkurës e cila është paraparë të nis në ora 11:00, do të jetë përpjekja e 19-të, e cila duke parë qëndrimet e partive politike që nuk kanë ndryshuar do të ketë fatin e 18-të seancave të kaluara, dështim.
