Asociacioni i Komunave të Kosovës ka shpreh shqetësimin të bazuar lidhur me rrezikun real të humbjes së mjeteve financiare deri në 15 milionë euro nga fondet e Komisionit Evropian, të dedikuara për komunat e Kosovës në kuadër të thirrjes IPA III “EU for Good Governance”.
Kryetari i AKK-së, Sazan Ibrahimi ka thënë për tëvë1.info se gjatë implementimit të projektit të Grantit të Performancës Komunale, donatorët ndërkombëtarë si EU, SDC, SIDA dhe Ambasada Norvegjeze kanë qenë kontribuesit kyç përmes fondeve të tyre të drejtpërdrejta, që kanë sjellë përfitime të prekshme për qytetarët nëpër komuna , duke ndihmuar dhe përmirësuar shërbimet dhe rritur cilësinë e jetesës.
“Në bazë të informatave të siguruara nga AKK, rezulton se Komisioni Evropian ka refuzuar propozimin e dorëzuar nga MAPL, për shkak se ai nuk ka përmbushur standardet dhe kriteret e kërkuara nga BE dhe si pasojë komunat në vitet në vijim do humbin deri në 15 milion euro. AKK, duke qenë partner kyç në zbatimin e projekteve me komunat dhe duke ndjekur me vëmendje këtë proces, ka kërkuar sqarime nga MAPL mirëpo fatkeqësisht, deri më sot, MAPL nuk ka ofruar asnjë sqarim zyrtar, duke lënë komunat pa informim për një çështje me ndikim të madh në zhvillimin lokal”, ka deklaruar ai.
Madje ai ka thënë se është e papranueshme që komunat e Kosovës të penalizohen dhe të mbeten pa fonde jetike.
Ibrahimi tutje ka thënë se do të kërkojnë llogaridhënie dhe transparencë të plotë në mënyrë se si trajtohen interesat komunave në raport me donatorët ndërkombëtar.
“Është krejtësisht e papranueshme që komunat e Republikës së Kosovës të penalizohen dhe të mbeten pa fonde jetike, vetëm për shkak të paaftësisë institucionale për të hartuar dhe dorëzuar një propozim serioz dhe në përputhje me standardet evropiane. Refuzimi nga Komisioni Evropian është një sinjal alarmi, jo vetëm për MAPL, por për tërë qeverisjen qendrore. Si AKK, ne nuk do të qëndrojmë të heshtur përballë këtij dështimi të rëndë. Kërkojmë llogaridhënie të menjëhershme, transparencë të plotë dhe një rishikim urgjent të mënyrës se si trajtohen interesat e komunave në raport me donatorët ndërkombëtarë. Komunat nuk mund të mbeten peng i papërgjegjshmërisë së dikujt që nuk përfaqëson interesin e tyre në mënyrë të denjë”, ka thënë ai ndër të tjera./teve1.info/
