Me vëmendje e vëzhguan gjithë procesin zgjedhor në Kosovë.
E gjithë të gjeturat nga monitorimi i zgjedhjeve parlamentare të mbajtura më 9 shkurt, Misioni i BE-së për vëzhgimin e zgjedhjeve në krye me Nathalie Loiseau i prezantoi të enjten.
Raporti vlerëson se procesi zgjedhor u ndikua nga organizimi i dobët nga Komisioni Qendror i Zgjedhjeve duke shkaktuar vonesa në shpalljen e rezultateve të vendvotimeve dhe atyre përfundimtare.
Në raport mes të tjerash thuhet se zgjedhjet ishin të qeta dhe konkurruese, mirëpo ka pasur edhe gjuhë nxitëse që e ka njollosur procesin.
“Fushata ka qenë dinamike, por kemi vërejtur një rritje të pluralizmit politik, por periudha dinamike e fushatës në një farë mënyrë u njollos nga retorika e ashpër dhe gjuha nxitëse” , tha Loiseau
Gjithashtu, shqetësim serioz shihet ndërhyrja e Serbisë në procesin zgjedhor duke ushtruar presion mbi qytetarët serbë për votuar një parti politike.
“Ne kemi vëzhguar raste të ndërhyrjeve të huaja në procesin zgjedhor. Ne po ashtu kemi marrë raport mbi votuesit në zonat me shumicë serbe. Ne kemi vërejtur politizim të institucioneve kyçe të përfshira në zgjedhje” , u shpreh kryesuesja e misionit vëzhgues të BE-së.
Loiseau po ashtu theksoi se gratë ishin në mënyrë të veçantë të shënjestruara nga gjuha e urrejtjes ndërsa mediet akoma përballen me shumë sfida.
“Pavarësia e mediave është vitale për demokraci të gjallë, derisa ne kemi vërejtur pluralizëm mediatik. Sektori i mediave përballet me sfida, përfshirë edhe fluskat e informacionit brenda vijave të komuniteteve etnike” , tha ajo.
Për monitorimin e procesit zgjedhor EU EOM shpërndau 104 vëzhgues nga të 27 vendet anëtare të Unionit Evropian, si dhe nga vendet partnere, Kanadaja, Norvegjia dhe Zvicra.
