Delegacioni rus ka mbërritur në Stamboll për bisedime paqeje me Ukrainën, konfirmoi të enjten zëdhënësja e Ministrisë së Jashtme të Rusisë, Maria Zakharova.
Nga ana tjetër, një delegacion ukrainas që përfshin edhe Presidentin Volodymyr Zelensky është nisur drejt Ankarasë, ku pritet të takohet me presidentin turk, Rexhep Tajip Erdogan.
Presidenti rus, Vladimir Putin nuk është pjesë e delegacionit rus, duke ngjallur kritika nga Perëndimi për mungesë serioziteti në përpjekjet për paqe. Delegacioni rus drejtohet nga ndihmësi i Putinit, Vladimir Medinsky, dhe përfshin edhe tre zyrtarë të tjerë të lartë, ka raportuar AP.
Zelensky, i cili ka kërkuar takim të drejtpërdrejtë me Putinin, nuk pranon të ulet në bisedime përveçse me vetë presidentin rus, sipas këshilltarit të tij Mykhailo Podolyak.
Delegacioni ukrainas përfshin gjithashtu Ministrin e Mbrojtjes Rustem Umerov, Ministrin e Jashtëm Andrii Sybiha dhe shefin e zyrës presidenciale Andriy Yermak.
Ende nuk është sqaruar vendi dhe ora e saktë e takimit, por pritet që të bëhen të ditura pas takimit Zelenskyy-Erdogan në Ankara. Agjencia ruse Tass raportoi se bisedimet do të zhvillohen në një zyrë presidenciale në Bosfor.
Ndërkohë, Rusia ka refuzuar propozimin perëndimor për një armëpushim të plotë 30-ditor, duke ofruar në vend të kësaj rifillimin e bisedimeve direkte. Kremlini e quajti këtë një “rinisje” të negociatave të dështuara të vitit 2022.
