Zyrtarë amerikanë dhe kinezë njoftuan të hënën se kanë arritur një marrëveshje për të ulur pjesën më të madhe të tarifave të vendosura kohët e fundit dhe për të shpallur një armëpushim 90-ditor në përplasjen e tyre tregtare, duke hapur rrugën për negociata të mëtejshme.
Lajmi u prit me entuziazëm nga tregjet financiare globale, ku aksionet u rritën ndjeshëm pasi dy ekonomitë më të mëdha të botës sinjalizuan një përpjekje serioze për të zbutur tensionet që kanë tronditur ekonominë globale.
Përfaqësuesi Tregtar i SHBA-së, Jamieson Greer, deklaroi se Shtetet e Bashkuara do të ulin tarifat ndaj mallrave kineze nga 145% në 30%, ndërsa Kina do të përgjysmojë tarifat ndaj produkteve amerikane nga 125% në 10%.
Ulja e tarifave u bë e ditur në një konferencë për shtyp në Gjenevë, ku Greer dhe Sekretari i Thesarit, Scott Bessent, njoftuan rezultatet pas dy ditësh bisedimesh intensive.
Bessent theksoi se të dyja palët janë të vendosura të shmangin ndarjen ekonomike. “Konsensusi i delegacioneve këtë fundjavë ishte se asnjëra palë nuk dëshiron një shkëputje,” tha ai.
“Ajo që kishim parë me këto tarifa të larta ishte, në thelb, një embargo. Dhe askush nuk e dëshiron këtë. Ne duam tregti — tregti më të balancuar — dhe besoj se të dyja palët janë të përkushtuara për ta arritur këtë.”
Përplasja tregtare midis SHBA-së dhe Kinës kishte arritur kulmin muajin e kaluar, kur administrata Trump rriti tarifat ndaj importeve kineze deri në 145%, ndërsa Kina u kundërpërgjigj me tarifa deri në 125%.
Këto nivele ekstremisht të larta e kishin bërë pothuajse të pamundur shkëmbimin e mallrave midis dy vendeve, të cilat vitin e kaluar kishin realizuar më shumë se 660 miliardë dollarë tregti të ndërsjellë.
Marrëveshja përfshin gjithashtu vendosjen e një strukture konsultimesh të vazhdueshme për të trajtuar çështje me të thella strukturore në marrëdhëniet tregtare mes dy vendeve.
Tregjet reaguan menjëherë ndaj lajmit. Kontratat e ardhshme të aksioneve amerikane u rritën mbi 2%, ndërsa indeksi Hang Seng në Hong Kong u rrit me gati 3%. Tregjet europiane gjithashtu panë rritje, me DAX në Gjermani dhe CAC 40 në Francë që u rritën me nga 0.7%, raporton AP.
Ndërsa administrata Trump ka vendosur tarifa ndaj disa vendeve, përplasja me Kinën ka qenë më intensive. Përveç çështjeve që lidhen me pronësinë intelektuale dhe disbalancat tregtare, SHBA kishte vendosur edhe një tarifë shtesë prej 20% ndaj disa mallrave kineze, si pjesë e një presioni për të ndalur eksportin e opioideve sintetike, si fentanili, drejt SHBA-së.
Armëpushimi 90-ditor krijon tani një dritare kohe për dialog të mëtejshëm, me qëllimin për të stabilizuar një nga marrëdhëniet tregtare më të rëndësishme në botë dhe për të shmangur një përshkallëzim tjetër të konfliktit.
